İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 58 Hüküm no: 1 Orijinal metin no: [1-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Palu kazası ve Palu’ya bağlı bazı köyler ahalisinin vefat eden Palu Ayanı Ali Bey’de alacakları olduğu iddiasıyla kardeşi Abdullah Bey’e açtıkları davanın hukuksuz olduğu Bâ-mukābele Harput sancağında vâki‘ Palu Kazâsı’nda ve sâir kurâlar re‘âyâları sâbık a‘yânları Hacı Ali Bey’den da‘vâları meşrû‘a olmadığı i‘lâm Ma‘rûz Ashâb-ı arzuhâl Anadolu’da Harput sancağında vâki‘ Palu Kazâsı’na tâbi‘ Hoşmat karyesi re‘âyâsından Kirkor v. Simon ve Habab karyesi re‘âyâsından Dülger Serkiz v. Dorador ve Karıncamezra karyesi re‘âyâsından Mikâil v. Bağdisar ve Nihri karyesi re‘âyâsından Asador v. Vartan ve Hubaş(?) karyesi re‘âyâsından Kukas v. Mardıros ve Benez(?) karyesi re‘âyâsından Ohannes v. Abraham ve Sekrat karyesi re‘âyâsından Hammâmî Simyon v. Abyel ve Nuhbey karyesi re‘âyâsından Toros v. Arakal ve Yeniköy karyesi re‘âyâsından Karabet v. Markos ve Kümbet karyesi re‘âyâsından Rençber Karabet v. Bedros ve Paho karyesi re‘âyâsından Serkiz v. Haçador ve Helalkom karyesi re‘âyâsından Minas v. Bogos ve Kapıaçmaz karyesi re‘âyâsından Mardıros v. Mardıros ve Uzunoba karyesi re‘âyâsından Kirkor [v.] Vartan ve Yeniköy mezra‘ası karyesi re‘âyâsından Markar v. Kazer ve Rencaran karyesi re‘âyâsından Haçador v. Danyal ve Karabörk karyesi re‘âyâsından Serkiz v. Mardıros ve Demirci karyesi re‘âyâsından Kasbar v. Şirvan ve Artıhan karyesi re‘âyâsından Manuk v. Haçador ve Gülüşkür karyesi re‘âyâsından Kirkor ve Ohan ve Pirik karyesi re‘âyâsından Mikâil v. Enyuk ve Beşaret karyesi re‘âyâsından Babek v. Abram ve Tavacı(?) karyesi re‘âyâsından Hazer v. Artin ve Karaköy karyesi re‘âyâsından Asador v. Karabet ve Abrenk karyesi re‘âyâsından Bekos v. Andon ve Tepe karyesi re‘âyâsından Melkon v. Ohan ve Tırha karyesi re‘âyâsından Haçador v. Asador ve Yarımca karyesi re‘âyâsından Avakim v. Manuk ve Tilk karyesi re‘âyâsından Bogos v. Kasbar ve Havarik karyesi re‘âyâsından Tomas v. Bağdisar ve Pafik karyesi re‘âyâsından Ohannes v. Polat ve Hacıalibey karyesi re‘âyâsından Toros v. Narsun ve Habusi karyesi re‘âyâsından Kirkor v. Mosis ve Sığam karyesi re‘âyâsından Ohannes v. Haçador ve Uzunova karyesi re‘âyâsından Mesrob v. Avadik ve Palu kasabası re‘âyâsından Antran v. Avanis ve Avanis v. Agop ve diğer Avanis v. Kokos nâm zimmîlerden her biri Pazartesi günü huzûr-ı hazret-i Fetvâ-penâhî’de ma‘kūd meclis-i şer‘-i hatîrde kazâ-i mezkûr a‘yânı sâbık derûn-ı arzuhâlde ismi mezkûr Abdullah Bey b. el-Hâc Ali Bey muvâcehesinde bin iki yüz elli beş senesi hilâlinde mârrü’z-zikr Palu kasabası kışlağında mukīm asâkir-i muntazama-i şâhânenin mekûlâtları’çün mûmâ-ileyh Abdullah Bey’in li-ebeveyn er karındaşı olup târih-i merkūmda kazâ-i mezkûr a‘yânı bulunan müteveffâ İbrahim Bey hayatında re‘âyâları olduğumuz kurâhâ-i mezkûr re‘âyâlarının mâllarından iştirâ ve kabz eylediği ma‘lûmü’l-keyl zehâirin esmânları olan iki yük doksan sekiz bin üç yüz elli guruşu müteveffâ-yı mûmâ-ileyh hayatında ahâli-i re‘âyâ-yı mersûmûn için cânib-i Hazîne-i âmireden tamamen ahz u kabz etmiş iken meblağ-ı merkūmu ashâbına vermeyip bi-gayrı hakkın kendi [2] umûruna sarfla istihlâk etmekle re‘âyâ-yı mesfûrûn ve meblağ-ı mezkûr iki yük doksan sekiz bin [üç yüz] elli guruşu yedimizde olup bin iki yüz elli altı senesi Ramazani’l-mübârekinin yirmi birinci günü târihiyle müverrah Harput nâibi İsmail Hakkı Efendi’nin mührüyle memhûr bir kıt‘a i‘lâm nâtık olduğu üzere merkūm Abdullah Bey müteveffâ-yı merkūmun hayatında vekîli olarak da‘vâ eylediklerinde meblağ-ı mezkûr iki yük doksan sekiz bin üç yüz elli guruşu kurâhâ-i mezkûr re‘âyâlarına edâ ve teslîm etmek üzere müteveffâ-yı merkūma hüküm ve tenbîh olundukdan sonra merkūm Abdullah Bey meblağ-ı mahkûmün-bih-i mezkûr iki yük doksan sekiz bin üç yüz elli guruşa tarafeynden bi’l-emr ve’l-kabûl kefâlet-i mutlaka ile kefîl ve zâmin olup ba‘dehû bir ay mürûrunda merkūm İbrahim vefât etmiş idi el-hâletü hâzihî biz kurâhâ-i mezkûre re‘âyâları taraflarından vekîlleri olmamızla iki yük doksan sekiz bin üç yüz elli guruşu merkūm Abdullah Bey’den kefâletine binâen bi’l-vekâle taleb ederiz deyü her biri taraflarından vekîlleri olduklarını iddi‘â eyledikleri kimesnelerin kendileri ve babaları ve dedeleri isimlerini zikr ü beyân ederek isbât-ı vekâlet etmediğine takrîr-i meşrûhları kavm-i nâ-mahsûr taraflarından vekâlet iddi‘âları meşrû‘a olmadığı müdde‘iyûn-ı mersûmûna tefhîm olunduğu İstanbul Mahkemesi’nden huzûr-ı âlîlerine i‘lâm olundu. Fî 21 Rebî‘ülâhir sene [12]57