İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 60 Hüküm no: 2 Orijinal metin no: [2-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahriye mülazımı Osman Ağa’ya kefaletten dolayı borcu olan Kiryako’nun borcunu ödemesi Mukābele şüd Mülâzım Osman Ağa’nın Kiryako zimmîden 1900 guruş hükmü [Ma‘rûz] Asâkir-i bahriye mülâzımlarından derûn-ı arzuhâlde mezkûrü’l-ism Osman Ağa b. Ebûbekir nâm kimesne Pazartesi günü huzûr-ı hazret-i Fetvâ-penâhî’de akd olunan meclis-i şer‘-i münîrde arzuhâl eden Kiryako v. Nikola nâm zimmî muvâcehesinde benim mersûm Kiryako zimmînin li-ebeveyn er karındaşı gāib ani’l-beled Manol v. el-mersûm Nikola v. Atam zimmî zimmetinde işbu yedimde olup târih-i İseviye’nin bin sekiz yüz otuz dokuz senesi Yuniyus ayının ikinci günü târihiyle müverrah Rumiyyü’l-imlâ bir kıt‘a temessük mantûkunca mâlımdan ve yedimden iktirâz ve kabz ve umûruna sarfla istihlâk eylediği bin dokuz yüz guruş alacak hakkım olup meblağ-ı mezkûra mersûm Kiryako zimmî tarafeynden bi’l-emr ve’l-kabûl kefâlet-i sahîha-i şer‘iye ile kefîl ve zâmin olmağla meblağ-ı mezkûr bin dokuz yüz guruşu kefâlet-i mahkiyesine binâen mesfûr Kiryako zimmîden hâlâ taleb ederim deyü da‘vâ ettikde ol dahi cevâbında külliyen inkâr etmekle müdde‘î-i mezbûr ber-vech-i muharrer müdde‘âsını her biri mahallerinde lede’t-tezkiye adl ve makbûlü’ş-şehâde idikleri ihbâr olunan asâkir-i bahriye çavuşlarından Mustafa b. Hüseyin ve Süleyman b. Mehmed nâm kimesneler şehâdetleriyle bi’l-muvâcehe ber-nehc-i şer‘î isbât etmeğin mûcebince meblağ-ı mezkûr bin dokuz yüz guruşu müdde‘î-i merkūm Osman Ağa’ya bi-hükmi’l-kefâle edâ ve teslîme mersûm Kiryako zimmîye tenbîh olunduğu huzûr-ı [âlîlerine i‘lâm olundu] Fî 12 Ş sene [1]257