İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 66 Hüküm no: 10 Orijinal metin no: [5-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Akif Ağa ile Ahmed Ağa’ya borcu olan Sarraf Filibos’un borcunu ödemesi Enderûn-ı Hümâyûn’dan muhrec es-Seyyid Mehmed Akif Ağa’nın ve sâirlerinin Sarrâf Filibos zimmîden 10263 guruş hükümleri Ma‘rûz Bâ‘is-i i‘lâm Enderûn-ı Hümâyûn’dan muhrec es-Seyyid Mehmed Akif Ağa b. es-Seyyid Mehmed ve kendi nefsinden asıl ve es-Seyyid Ahmed Ağa b. Abdullah b. Abdurrahman tarafından husûs-ı âti’l-beyânda vekîl olduğu es-Seyyid Hasan Efendi b. es-Seyyid Mehmed ve el-Hâc Süleyman Ağa b. Abdullah nâm kimesneler şehâdetleriyle sâbit olan el-Hâc Mehmed Salih Ağa b. Ahmed Nazif nâm kimesnelerden her biri meclis-i şer‘-i münîrde Büyük Yenihan sarrâflarından Filibos v. Avanis nâm zimmî muvâcehesinde asıl ve vekîl-i merkūmândan mezbûr es-Seyyid Mehmed Akif Ağa benim mersûm Filibos zimmî zimmetinde cihet-i deyn-i şer‘îden altı bin yedi yüz elli guruşdan bâkī üç bin yüz doksan beş guruş ve asıl ve vekîl-i merkūm el-Hâc Mehmed Salih Ağa benim dahi mersûm Filibos zimmî zimmetinde kezâlik cihet-i karz-ı şer‘îden on beş bin yedi yüz on bir guruşdan bâkī iki bin altı yüz sekiz guruş ve müvekkilim merkūm es-Seyyid Ahmed Ağa’nın dahi mersûm Filibos zimmî zimmetinde kezâlik cihet-i deyn-i şer‘îden on dört bin yedi yüz altmış guruşdan bâkī dört bin dört yüz altmış guruş ki cem‘an on bin iki yüz altmış üç guruş alacağımız olmağla meblağ-ı mecmû‘-ı mezkûru mersûm Filibos zimmîden bi’l-asâle ve bi’l-vekâle hâlâ taleb ederim deyü ba‘de’d-da‘vâ ve’l-istintâk ol dahi cevâbında kaziyye minvâl-i muharrer üzere olduğunu bi-tamamihâ tâyi‘an ve kat‘iyyen i‘tirâf etmeğin mûcebince meblağ-ı mecmû‘-ı mezkûrdan meblağı bâkī-i mezbûr üç bin yüz doksan beş guruşu asl-ı merkūm es-Seyyid Mehmed Akif Ağa’ya ve meblağ-ı bâkī-i mezbûr iki bin altı yüz sekiz guruşu asıl ve vekîl-i merkūm el-Hâc Mehmed Salih Ağa’ya ve meblağ-ı mezbûr dört bin dört yüz altmış guruşu müvekkil-i merkūm es-Seyyid Ahmed Ağa için vekîl-i mezbûr es-Seyyid Mehmed Salih Ağa’ya edâ ve teslîme mersûm Filibos zimmîye tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî 25 Receb sene [12]57