İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 65 Hüküm no: 9 Orijinal metin no: [5-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Behram Ağa’nın alacak iddiasıyla Ayşe Hanım’a açtığı davada sulh olduğu Behram Ağa’nın Âişe Hanım ile 2500 guruşa sulhu Ma‘rûz Sâhib-i arzuhâl Behram Ağa b. Abdullah nâm kimesne İstanbul Mahkemesi’nde meclis-i şer‘-i münîrde derûn-ı arzuhâlde mezkûrü’l-ism olup sene-i sâbıkā Recebi’l-ferdi hilâlinde vefât eden Pirinççi el-Hâc İbrahim Ağa b. el-Hâc Mehmed b. Abdullah’ın sulbiye kebîre kızı ve hasran vârisesi kezâlik derûn-ı arzuhâlde mezkûretü’l-ism Âişe Hatun tarafından husûs-ı âtîde vekîl olduğu zâtını ârifân el-Hâc Musa Ağa b. el-Hâc Mustafa ve Hasan Ağa b. Mehmed şehâdetleriyle sâbit olan zevci Mehmed Necib Efendi b. el-Hâc Ahmed muvâcehesinde ben müteveffâ-yı merkūmun mu‘takı olmamla mûrisim müteveffâ-yı merkūm el-Hâc İbrahim Ağa elli beş senesi Recebi’l-ferd’inin yirmi beşinci günü hayatında ben bi-emrillâhi te‘âlâ vefât eylediğimde sülüs mâlımdan beş bin guruş mu‘takım Behram Ağa’ya (edâ) oluna deyü vesâyet ve musırran alâ-îsâihî fevt olmağla meblağ-ı mezkûr beş bin guruşu müvekkile-i merkūme Âişe Hatun’un vâzı‘atü’l-yed olduğu tereke-i müteveffâ-yı merkūmdan hâlen taleb ederim deyü tasaddî eylediğim da‘vâmdan bâ-tavassut-ı muslihîn vekîl-i merkūm Mehmed Necib Efendi ile kat‘a li’n-nizâ‘ iki bin beş yüz guruş üzerine bi’t-terâzî ba‘de akdi’l-musâlaha ve’l-kabûl bedel-i sulh-ı mezkûrdan mâ‘adâ ziyâde müdde‘âma ve vekîl-i merkūmdan mutâlebe eylediğim bin yüz guruş ecr-i mislime ve bi’l-cümle husûs-ı mezkûra ve işbu târih-i i‘lâma gelince sâir cemî‘ hukūk-ı şer‘iyeye müte‘allika âmme-i da‘vâdan vekîl-i merkūm Mehmed Necib Efendi ile zevcesi müvekkile-i merkūme Âişe Hatun’un zimmetlerini vekîl-i merkūm Mehmed Necib Efendi dahi kezâlik bi’l-cümle husûs-ı mezkûra ve târih-i i‘lâm-ı merkūma gelince sâir cemî‘ hukūk-ı şer‘iyeye müte‘allika âmme-i da‘vâdan benim zimmetimi her birimizi bi’l-asâle ve bi’l-vekâle ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr iki bin beş yüz guruşu müdde‘î-i merkūm Behram Ağa’ya bi’t-taleb edâ ve teslîme müvekkile-i merkūme Âişe Hatun’a izâfetle zevci vekîl-i merkūm Mehmed Necib Efendi’ye tenbîh olunduğu. Fî 13 Şa‘bân sene [12]57