Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 445 Hüküm no: 525 Orijinal metin no: [86a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali b. Himmet b. Abdullah’ın çocuklarına anneleri Rabia’nın vasî tayin edilmesi Mahmiye-i İstanbul’da Dülgerzâde mahallesinde sâkin iken bundan akdem vefât eden Ali b. Himmet b. Abdullah’ın verâseti zevce-i metrûkesi Râbia bt. Abdullah sulbî sagīr oğulları İsmail ve Ahmed ve vâlidesi Kezban’a münhasıra olduğu şer‘an sâbit oldukdan sonra sagīrân-ı mezbûrânın babalarından intikāl eden mâlların hıfz ve ahvâllerin zabt için bir vasî nasb ta‘yîn olunmak lâzım ve mühim ve vâlideleri mezbûr Râbia her vech[ile] vesâyet-i mezbûr uhdesinden gelmeye kādir olduğunu zeyl-i kitâb[da] mektûbü’l-esâmî müslimîn ihbâr etmeğin mezbûr Râbia Hâtun mezbûrânın tesviye-i umûrlarına kıbel-i şer‘den vasî nasb ve ta‘yîn olundukda ol dahi kabûl ve hizmet-i lâzımesin edâya ta‘ahhüd ettikden sonra mezbûre Râbia meclis-i şer‘de İshak Çelebi [b.] Mehmed mahzarında ikrâr edip vasîleri olduğum sagīrân-ı mezbûrânın emirlerini tesviye ve ba‘zı kimesnelere i‘tirâf edip vasîleri oldum dedikde ol dahi iltizâm etmeğin mâ vaka‘a bi’t-taleb ketb olundu. Fi’l-yevmi’s-sâbi‘ aşer min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Mehmed Efendi b. Osman el-İmâm, Müezzin Ali Efendi, Mehmed b. Abdi, Abdülbâkī b. (...).