Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 446 Hüküm no: 527 Orijinal metin no: [86b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Abdullah’ın borcuna karşılık Hacı Sefer b. Ömer’e evini rehin verdiği Mahmiye-i İstanbul’da Çavuş Mescidi mahallesi sâkinlerinden Mehmed Çelebi b. Abdullah nâm kimesne meclis-i şer‘-i şerîfde mahmiye-i mezbûrede Akşemseddin mahallesi sâkinlerinden bâ‘isü hâze’l-kitâb el-Hâc Sefer b. Ömer nâm kimesne tarafından husûs-ı âti’l-beyâna vekîl olduğu Mahmud Çelebi b. İbrahim ve Ahmed Çelebi b. Mehmed nâm kimesneler şehâdetleriyle şer‘an sâbit olan Süleyman Çelebi b. Ahmed nâm kimesne mahzarında ikrâr ve takrîr-i kelâm edip müvekkil-i mezbûr Hacı Sefer’e cihet-i karzdan yirmi dört bin akçe ve semeni târih-i kitâbdan yüz seksen bir gün tamâmına değin müeccel ve mev‘ûd keçe bahâsından dahi on beş bin seksen akçe ki cem‘an otuz dokuz bin seksen akçe deynim olmağla meblağ-ı mezbûr mukābelesinde yedimde mülküm ve hakkım olup mahalle-i mezbûrede vâki‘ bir tarafdan el-Hâc İbrahim mülkü ve bir tarafdan Hasan Ağa mülkü ve bir tarafdan bana meşrûta olan âhar mülküm ve bir tarafdan tarîk-i âm ile mahdûd büyût-ı adîdeyi müştemil menzilimi cümle tevâbi‘ ve levâhıkı ve kâffe-i hukūk ve merâfıkı ile müvekkil-i mezbûr el-Hâc Sefer’e rehin vaz‘ ve teslîm ol dahi ber vech-i muharrer irtihân ve tesellüm ve kabz eyledi dedikde gıbbe’t-tasdîki’ş-şer‘î mezbûr Mehmed Çelebi i‘âde-i kelâm edip eğer müddet-i mezkûr tamâmında meblağ-ı mezbûr otuz dokuz bin akçeyi mezbûr el-Hâc Sefer’e edâ edemeyip zimmetimde kalırsa menzil-i mahdûd-ı mezkûru semen-i misli ile âhara bey‘ ve kabz-ı semen ve semeninden deyn-i mezkûru edâya ve fazla kalırsa bana îsâle ve bunlar mütavakkıf olduğu umûrun küllîsine tarafımdan azl ve in‘izâlden masûne vekâlet-i devriyye ile işbu vekîl-i mezbûr Süleyman Çelebi’yi vekîl ve nâib-i menâb nasb ve ta‘yîn eyledim dedikde ol dahi vekâlet-i mezbûreyi kabûl ve hizmet-i lâzımesini edâya ta‘ahhüd etmeğin mâ vaka‘a bi’t-taleb ketb olundu. Fi’l-yevmi’t-tâsi‘ aşer min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Keçeci el-Hâc Ali Beşe, Kara Mehmed b. Halil, keçeci Ömer Beşe b. ( ), İbrahim Çelebi b. Ahmed, Siyavuş b. Abdullah ve gayruhüm.