Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 450 Hüküm no: 531 Orijinal metin no: [87b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Efendi b. Hasan’ın Ömer Efendi ve Afife Hatun Vakfı’ndan aldığı borca karşılık bazı eşyalarını rehin verdiği Mahrûse-i Galata müzâfâtından İstinye’de sâkin Mehmed Efendi b. Hasan b. Mustafa nâm kimesne meclis-i şer‘-i şerîf-i enverde ashâb-ı hayrâtdan merhûm Ömer Efendi ve merhûme Afîfe Hâtun bt. Kadri Efendi’nin nukūd-ı mevkūfelerine bi’l-fi‘l mütevellî olan bâ‘isü’l-kitâb Hüseyin Efendi b. Ahmed mahzarında ikrâr ve takrîr-i kelâm edip menzil-i mezbûru Hüseyin Efendi yedinden dört yüz esedî guruşa istidâne, ol dahi vakfeyn-i mezbûreyn mâllarından idâne ve tesellüm eylediğinden sonra semeni târih-i kitâbdan bir sene tamâmına değin müeccel ve mev‘ûd yedinden iştirâ ve kabz eylediğim bir Mushaf-ı şerîf semeninden dahi kırk beş esedî guruş ki min haysi’l-mecmû‘ dört yüz kırk beş esedî guruş vâcibü’l-edâ deynim olmağla meblağ-ı mezbûr mukābelesinde eşyâ-i memlûkümden bir çift altın bilezik ve bir tek altın ve burma ve bir altın zincir ve dokuz aded altın düğme ve bir balıkçı? taşlı na‘lça ön kuşağı ve üç sîm kılıç ve iki sîm gaddâre ve beş sîm raht ve iki reşme ile ve bir Müşkilât-ı Mesâbih ve cild-i sânî bir İnâbe kitâbımı mütevellî-i mezbûr Hüseyin Efendi yedine rehin vaz‘ ve teslîm ol dahi ber vech-i muharrer irtihân ve kabz ve teslîm eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâmis aşer min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: İstinyeli Hüseyin Efendi b. Hayrullah el-İmâm, Mehmed Çelebi b. Muharrem, Ahmed Efendi b. Ahmed, Ahmed Beşe b. Davud, İbrahim Çelebi b. Ahmed.