Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 450 Hüküm no: 530 Orijinal metin no: [87b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Bey b. Bâli Beşe’nin ev hissesini Hacı Mustafa b. Yusuf’a satması Vilâyet-i Rumeli’nde Hersek sancağında Çayniçe kazâsına tâbi‘ Kürada? nâm karye ahâlîsinden Ahmed Bey b. Bâli Beşe nâm kimesne meclis-i şer‘-i şerîf-i enverde işbu bâ‘isü’l-kitâb el-Hâc Mustafa b. Yusuf mahzarında ikrâr-ı tâm ve takrîr-i kelâm edip mahmiye-i İstanbul’da Üskübî mahallesinde vâki‘ iki tarafı tarîk-i âm ve iki tarafı Köse Muhyi? dükkân cânibi ve Ayasofya-i Kebîr vakfı ile mahdûd fevkānî üç kebîr oda ve bir sagīr fevkānî oda ve tahtapûş ve ahır ve kuyu ve iki kenîf ve bir sebzeci dükkânını müştemil mülk menzilimin nısfı karındaşım Abdullah’ın ve nısf-ı âharı benim mülküm olmağla menzil-i mezbûrda olan nısf hisse-i şâyi‘amı bi cümleti’t-tevâbi‘ ve’l-levâhık mezbûr el-Hâc Mustafa’ya üç yüz elli esedî guruşa bey‘ ve temlîk ve teslîm ol dahi iştirâ ve kabûl ve temellük eylediğinden sonra semeni olan meblağ-ı mezbûr üç yüz elli guruşu yedinden alıp kabz eyledim ba‘de’l-yevm menzil-i mezbûrda olan nısf hissem mezbûr el-Hâc Mustafa’nın mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ aşer min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Mehmed Efendi İmâm-ı Üskübî, İbrahim b. Mehmed el-Müezzin, es-Seyyid Mehmed b. Ali, Osman Efendi el-Kayyım, Ali b. Receb, Mehmed b. Mirza, Mustafa b. Receb, Ömer Beşe b. Abdullah, Veli Efendi b. Receb Sahhâf, Ebûbekir Efendi b. Yusuf ve gayruhüm mine’l-huzzâr.