Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 452 Hüküm no: 533 Orijinal metin no: [88a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Abdullah’ın evini Abdülbâki b. İbrahim’e bey‘ bi’l-istiğlâl yoluyla sattığı Mahmiye-i İstanbul hısnı ebvâbından Topkapısı kurbunda Arpa emîni mahallesinde sâkine Ayşe Hâtun bt. Abdullah zâtını ma‘rifet-i şer‘iyye ile ârifân olan Ali Çelebi Mehmed Çelebi b. Receb ta‘rîfleriyle mu‘arrefe oldukdan sonra meclis-i şer‘-i şerîf-i enverde sulbiye kızı Hatice nâm sagīrenin vâlidesi Alîme bt. Abdullah’ın müstakillen mâl-ı mevrûsuna velâyeten vâzı‘ü’l-yed olan babası Abdülbâkī b. İbrahim mahzarında bi tav‘ihâ ikrâr edip yedimde mülk ve hakkım olup mahalle-i mezbûrda vâki‘ bir tarafdan Fâtıma bt. Hasan mülkü ve bir tarafdan eş-Şeyh İskender vakfı ve bir tarafdan İsmihan nâm hâtun mülkü ve bir tarafdan tarîk-i âm ile mahdûd mülk menzil[i] cümle tevâbi‘ ve levâhıkı ile mezbûr Abdülbâkī’ye yüz on esedî guruşa bi tarîki’l-istiğlâl bey‘ ve teslîm ol dahi minvâl-i meşrûh üzre sagīre-i mezbûrenin malı ile iştirâ ve kabz ve tesellüm eylediğinden sonra semeni olan meblağ-ı mezbûr yüz on guruşu yedinden tamâmen ahz u kabz eylediğimden [sonra] bir sene tamâmına değin on altı buçuk guruşa bana îcâr ve teslîm ve kabz eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Mehmed Çelebi b. Ahmed, Ali Çelebi b. Receb, İbrahim Çelebi b. Ahmed, Mahmud b. Hasan.