Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 452 Hüküm no: 534 Orijinal metin no: [88a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Yusuf’un câriyesi Gülistan’ı azat etmesi Mahmiye-i İstanbul’da Sinan Paşa mahallesinde sâkin Mustafa Ağa b. Yusuf tarafından husûs-ı âti’l-beyâna vekîl olduğu oğlu Ahmed Beşe ve Mustafa b. İvaz şehâdetleriyle sâbit olan Hasan Beşe b. Mehmed nâm kimesne meclis-i şer‘-i hatîr-i enverde bi’l-vekâle ikrâr ve takrîr-i kelâm edip müvekkilim mezbûr Mustafa Ağa kendiye rıkkını mu‘terife olan orta boylu açık kaşlı sarı ala gözlü Rûsiyyetü’l-asl bâ‘isetü hâze’l-kitâb Gülistan bt. Abdullah nâm câriye-i memlûkesini hasbeten lillâh malından tahrîr ve i‘tâk ve zümre-i harâir-i asliyyâta idrâc ve ilhâk eyledi ba‘de’l-yevm mevsûf-ı merkūme Gülistan sâir harâir-i asliyyât gibi hürre olup üzerinde velâ-i şer‘îden gayrı hakkı kalmadı dedikde mâ vaka‘a bi’t-taleb ketb olundu. Fi’l-yevmi’s-sâlis min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Ömer Ağa b. ( ), Mustafa Çelebi Hammâmîzâde, Mustafa b. İvaz, Ahmed Beşe b. Mustafa.