Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 453 Hüküm no: 535 Orijinal metin no: [88a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Balat’taki harap olan Aya Yani Kilisesi’nin tamirine izin verildiği Kenâis-i millet-i Mesihiyyeden Mısr-ı Kahire tarafında Tûr-ı Sînâ zeylinde vâki‘ beyne’n-nasârâ Sînâ demekle meşhûr manastır müzâfâtından olup Dârü’l-hilâfeti’l-aliyye Kostantıniyye el-mahmiyye hısnı ebvâbından Balatkapısı hâricinde Karabaş mahallesinde bir tarafdan kürkçü tâifesinden işbu Pavli nâm zimmî ve bir tarafdan Yorgaki nâm zimmî mülkleri ve bir tarafdan ba‘zan harâbe odalar ve ba‘zan tarîk-i hâs bir tarafdan sâhil-i bahr ile mahdûd Aya Yani demekle ma‘rûf kilisesi bundan akdem harâb olup yine tâife-i nasârâdan Moskov elçisi iltimâsıyla mesâğ-ı şer‘î olan vechile bilâ-isâ‘ ve’l-irtifâ‘ vaz‘-ı kadîmi üzre imâret ve meremmetine taraf-ı şehriyârdan ruhsat verilip vech-i meşrûh üzre imâret olundukdan sonra bi’z-zât üzerine varıp vaz‘-ı kadîmi tecâvüzleri var mıdır keşf ve mu‘âyene ve müşâhede olunup min ba‘d içinde âyin-i âtıllarını icrâda tâife-i mezbûreye ta‘arruz olunmaya deyû bu fakīre hitâben fermân sâdır olmağın imtisâlen-leh lâ i‘âneten aleyhi yine husûs-ı mezkûra mübâşir ta‘yîn buyrulan çavuşları kâtib fahrü’l-eşbâh? Mehmed Efendi b. Ahmed ve kilise-i mersûmenin vaz‘-ı kadîmine vukūf-ı tâmmı olup zeyl-i sütûrda isimleri mastûr müslimîn ile üzerine varıp keşf ve mu‘âyene ve mesâha olundukda bundan esbak keşf ve mesâha ve hüccet olunan mevzi‘ şark ve garben ve cenûben ve şimâlen vaz‘-ı kadîmi üzre min gayri ziyâde imâret olunup arsa ve binâsı isâ‘ ve irtifâ‘ hatt-ı evvelini mütecâviz olmadığına vaz‘-ı kadîmine ârifân olan sikāt-ı makbûletü’l-kelimât icmâ‘ ve ittifâk etmeğin hakīkat-i hâli bâ fermân-ı âlî ketb olundu. Fi’l-yevmi’l-hâmis min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Hüseyin Çelebi b. Ramazan, Ahmed Çelebi b. Mustafa, Mehmed Çelebi b. Abdülbereket, Mehmed Çavuş b. Abdullah.