Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 454 Hüküm no: 537 Orijinal metin no: [88b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Süleyman Çelebi b. Hasan’ın arsalarını İsmail Efendi b. Receb’e sattığı Mahmiye-i İstanbul’da Şeyh Ebülvefâ mahallesinde sâkin Süleyman Çelebi b. Hasan Efendi meclis-i şer‘-i şerîf-i enverde işbu râfi‘ü’l-kitâb İsmail Efendi b. Receb mahzarında ikrâr ve takrîr-i kelâm edip yedimde mülk ve hakkım olup mahalle-i mezbûrede vâki‘ bir tarafdan Molla Çelebi vakfı ve bir tarafdan el-Hâc Fazlı mülkü ve bir tarafdan Râbia Hâtun mülkü ve ba‘zan Muharrem Ağa mülkü ve bir tarafdan zikri âtî arsa ile mahdûd tûlen ve arzen bi hesâb-ı terbî‘î dört yüz zirâ‘ olup bir su kuyusunu müştemil mülk arsa-i hâlîyi bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık bey‘-i bâtt-ı kat‘î ile merkūm İsmail Efendi’ye dört yüz yirmi esedî guruşa bey‘ ve teslîm ve merkūm Şeyh Ebülvefâ vakfından olup arsa-i mezkûreye muttasıl bir tarafdan mülk arsa-i mezbûre ve bir tarafdan müte’ehhilîn odaları ve bir tarafdan Ali Bey menzili ve bir tarafdan tarîk-i âmla mahdûd taht-ı tasarrufumda vakıf arsa-i hâlîyi dahi izn-i mütevellî ile meccânen ferâğ ve tefvîz merkūm İsmail Efendi dahi iştirâ ve tesellüm ve kabûl ettiğinden sonra semen-i mezkûr dört yüz yirmi guruşu yedinden tamâmen ahz u kabz eyledim min ba‘d arsateyn-i mezbûreteynde bir vechile alâka ve medhalim kalmayıp müşterî-i merkūmun mülkü ve hakk-ı müfevvezi olmuşdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-ışrîn min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: El-Hâc Yusuf b. Abdullah, el-Hâc Mehmed b. Budak?, Ahmed Efendi b. Ömer el-İmâm, Süleyman Çelebi b. Abdullah, el-Hâc Şaban b. Receb, el-Hâc Mehmed b. Hüseyin, Cafer b. Ahmed, İbrahim b. Receb, Mehmed Çelebi b. İbrahim.