İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 266 Hüküm no: 219 Orijinal metin no: [84-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Andon v. Lazari’nin kebabcı ve aşçı esnafının kurallarına uymadığı için ihrac olunması Esnâfdan ihrâc [Ma‘rûz] Âsitâne-i aliyye’de vâki‘ kebâbcı ve aşçı esnâfının Kethudâsı Ali Ağa b. Hüseyin ve yazıcısı İsmail Efendi b. İbrahim ve Yiğitbaşısı es-Seyyid el-Hâc Ebûbekir Ağa b. Mustafa ve Galata ve tevâbi‘inde vâki‘ kebâbcı ve aşçı esnâfının Kethudâsı diğer Ali Ağa b. Ahmed ve Yiğitbaşısı Abdullah b. Ahmed nâm kimesneler ve esnâf-ı mezkûrelerden Kiragos v. Anparsun ve Nikola v. Kostandi ve İstavri v. Bodos ve Naum v. Hıristo nâm zimmîler ve sâirleri meclis-i şer‘-i münîrde Andon v. Lazari zimmî muvâcehesinde mersûm Andon zimmî esnâfımızdan olarak İstanbul’da Kumkapı hâricinde kebâbcı ve aşçı <> aşçı olup lâkin şurût ve nizâmımızdan bir şarta itâ‘at ve ri‘âyet etmeyip dâimen ve müstemirren mugāyiri hareket ve bu esnâda ba‘zı tezvîr da‘vâlara dahi tasaddîye cesâret eylediğinden bi’d-defa‘ât kendine nush u pend olundukda ısgā etmeyip ısrâr etmekle mersûmûn vech-i meşrûh üzere ictisâr eylediği harekât-ı nâ-bercâsına tahammül ve tâkatımız kalmamışdır deyü iştikâ ve kesb-i âhara şurû‘ birle esnâfdan ihrâc olunmasını iltimâs ve istid‘â ettiklerinde mersûm Andon zimmî dahi kesb-i âhara şurû‘ ile esnâf-ı mezkûreden hurûca ta‘ahhüd eylediği İstanbul Mahkemesi’nden huzûr-ı âlîlerine i‘lâm olundu bâkī emr ü fermân hazret-i men-lehü’l-emrindir. Fi’l-yevmi’l-hâdî aşer min-Saferi’l-hayr li-sene semân ve hamsîn ve mi’eteyn ve elf.