İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 267 Hüküm no: 220 Orijinal metin no: [85-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vakıf kasap gediği hissesinin satışı İ‘lâmı tashîh olunmağla kaydı dahi tashîh olunmuşdur. Ma‘rûz Hudâvendigâr-ı esbak müstağrak-ı bihâr-ı rahmet-i Hak cedd-i emced-i hazret-i Hilâfet-penâhî mazhar-ı gufrân-ı İlâhî Sultan Abdülhamid Han -aleyhi eltâfü Rabbihi’l-Mennân- evkāf-ı celîleleri müstegallâtından Yedikule hâricinde kâin gayrı ez selhhâne-i mîrî on aded ganem selhhânelerinin şerâit-i mu‘teberelerine ri‘âyet şartıyla altıncı selhhâneye merbût kasab dükkânlarından mahrûse-i Galata’ya muzâfe kasaba-i Kasımpaşa’da Sebil Köprüsü nâm mahâlde kâin ma‘lûmü’l-hudûd bir bâb kasab dükkânı derûnunda mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûmenin nısf hissesine bâ-temessük-i mütevellî bi’l-icâreteyn mutasarrıf olan Yorgi v. Yani zimmî evkāf-ı celîle-i mezkûre kāimmakām-ı mütevellîsi ecille-i ricâl-i saltanat-ı seniyyeden hâlâ Evkāf Nâzırı atûfetlü semâhatlü Numan Mahir Beyefendi taraflarından mürsel vekîlleri Ahmed Ağa b. Abdullah hâzır olduğu hâlde meclis-i şer‘-i münîrde kasab tâifesinden bâ‘isü’l-i‘lâm <> Vasil v. Tarandafil zimmî muvâcehesinde hâlâ Kassâbân müdîri es-Seyyid Mehmed Ali Bey ve sâir mazbûtü’l-esâmî kasab ustaları hâzır oldukları hâlde takrîr-i kelâm edip dükkân-ı mezkûr derûnunda mevcûde vakf-ı müşârün-ileyh müstegallâtından taht-ı tasarrufumda olan nısf âlât-ı gedik-i mezkûrun nısf hissesini uhdemde ibkā edip mâ‘adâ nısf hissesini yani rub‘ âlât-ı gedik-i merkūmu hüsn-i rızâ ve tayyib-i hâtırım ve ferâğ-ı mu‘teber-i kat‘î ile mersûm Kosta [Vasil] zimmîye bedel-i ma‘lûm ve makbûz ve müstehlek mukābelesinde bâ-re’y-i mütevellî ferâğ ve tefvîz ve teslîm eylediğimde ol dahi ber-vech-i muharrer tefevvüz ve tesellüm ve kabûl ve hisse-i tevzî‘ini müdîr ve kasab ustaları ma‘rifetleriyle almağa ta‘ahhüd edip fî-mâ ba‘d rub‘ âlât-ı gedik-i mezkûr mesfûr <> Vasil zimmînin hakk-ı müfevvezi olup benim aslâ ve kat‘a alâka ve medhalim kalmamışdır deyü ba‘de’l-ikrâr <> ve’t-tesâdık gedik-i mezkûrun rub‘ hissesi fâriğ-i mersûm Yorgi zimmînin ferâğından defter-i vakf-ı şerîfde mersûm <> Vasil zimmî uhdesine kayd ve der-dest olan temessük-i mezkûrdan ifrâz birle şerh verilip zabt ü tasarrufi’çün taraf-ı vakfdan müceddeden bir kıt‘a temessük tahrîr ve temhîr ve mersûm Kosta [Vasil] zimmî yedine i‘tâ buyurulmak iktizâ eylediği İstanbul Mahkemesi’nden huzûr-ı [âlîlerine i‘lâm olundu] Fî 7 S sene [1]258