İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 320 Hüküm no: 275 Orijinal metin no: [102-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun bt. Mustafa’nın Tophane bahçesindeki hisselerinden bir kısmını Suyolcu Hasan Efendi b. Mustafa’ya sattığı Tophâne bahçe nizâ‘ına dâir [Ma‘rûz] Kaymak Hüseyin Ağa zevcesi mu‘arrefetü’z-zât Emine Hatun bt. Mustafa bi’l-ma‘iyye rü’yete memûr evkāf müfettişi İstanbul pâye-i celîlesiyle mübâhî izzetlü fazîletlü es-Seyyid Mehmed Emin Âsaf Beyefendi tarafından meb‘ûs Mehmed İzzet Efendi hâzır olduğu hâlde bi’t-terâzî Bâb-ı Cenâb-ı Fetvâ-penâhî’de İstanbul kādıları dâ‘îlerine tahsîs buyurulan dâirede ma‘kūd meclis-i şer‘-i münîrde sâhib-i arzuhâl Suyolcu Hasan Efendi b. Mustafa muvâcehesinde bâ-irâde-i seniyye Hazîne-i Evkāf-ı Haremeyn-i Muhteremeyn tarafından idâre olunan evkāfdan merhûm Tülbencizâde el-Hâc Mustafa Efendi Vakfı’nın bi’l-meşrûta hâlâ mütevellîsi es-Seyyid Ahmed Halid Efendi tarafından mürsel vekîli câbî-i vakf Hafız Ahmed Efendi b. Hüseyin hâzır olduğu hâlde vakf-ı mezkûr müsakkafâtından mahrûse-i Galata’ya muzâfe kasaba-i Tophâne’de Firuzağa mahallesinde kâin ma‘lûmü’l-hudûd terbî‘an iki bin dört yüz otuz altı zirâ‘ bir bâb vakıf bahçeden müfrez derûnunda bir bostan kapısını [kuyusunu] müştemil terbî‘an altı yüz zirâ‘ mahâlli şehriye otuz akçe icâre-i müeccele ile benim ve yine bahçe-i mezkûrdan müfrez ve mahâll-i mezkûra muttasıl terbî‘an sekiz yüz on iki zirâ‘ mahâlli dahi kezâlik şehriye otuz akçe icâre-i müeccele ile mezbûr Hasan Efendi’nin bâ-temessük-i mütevellî taht-ı tasarrufumuzda olup ben ber-vech-i muharrer mutasarrıfe olduğum terbî‘an altı yüz zirâ‘ mahâll-i mezkûrun bir tarafdan ber-vech-i âtî uhdemde bâkī kalan mahal ve iki tarafdan mezbûr Hasan Efendi’nin mutasarrıf olduğu mahâll-i merkūm ve bir tarafdan mezbûrun menzili nerdubânı ile mahdûd tûlen kırk zirâ‘ ve arzen bir buçuk zirâ‘ terbî‘an yüz on üç buçuk zirâ‘ mahâllini bâ-re’y-i mütevellî ifrâz ve alâmet-i fâsıla vaz‘ıyla imtiyâz ve mâ‘adâ terbî‘an dört yüz seksen yedi zirâ‘ mahâllini ve mahâll-i müfrez-i merkūm ile müfrezine olan mahâll-i mezkûr beynlerinde vâki‘ bi’r-i mâ-i merkūmun nısf hisse-i şâyi‘asını uhdemde ibkā edip terbî‘an yüz on üç zirâ‘ mahâll-i müfrez-i mezkûru ve bi’r-i mâ-i mezkûrun nısf hisse-i şâyi‘a-i âharını hüsn-i rızâ ve tayyib-i ihtiyârım ve ferâğ-ı mu‘teber-i kat‘î ile mezbûr Hasan Efendi’ye dört yüz elli iki guruş bedel-i makbûz mukābelesinde bâ-izn-i mütevellî ferâğ ve tefvîz eylediğimde ol dahi ber-vech-i muharrer tefevvüz ve kabûl edip fîmâ-[ba‘d] terbî‘an yüz on üç zirâ‘ mahâll-i mahdûd-ı mezkûr ve nısf hisse-i şâyi‘a-i bi’r-i mâ-i merkūm mezbûr Hasan Efendi’nin hakk-ı müfevvezi olup mahâll-i mezkûrda benim aslâ ve kat‘a alâkam kalmayıp ve bi’r-i mâ-i mezkûru dahi mezbûr ile ale’l-iştirâki’s-seviyy zabt ü tasarrufa tarafeynden her birimiz ta‘ahhüd edip bu vechile kat‘-ı münâza‘a eyledik deyü ikrâr ve tasâdıkları tescîl ve İstanbul Mahkemesi’nden huzûr-ı [âlîlerine i‘lâm olundu] Fî 29 min-Ra sene [12]58