İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 320 Hüküm no: 274 Orijinal metin no: [102-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamamcı İbrahim Edhem Efendi’nin Hamamcı Yusuf Ağa’daki alacağını tecil ettiği 5900 [guru]ş tecîl [Ma‘rûz] Sâhib-i arzuhâl Hamamcı İbrahim Edhem Efendi b. Mehmed meclis-i şer‘-i münîrde derûn-ı arzuhâlde mezkûrü’l-ism yine Hamamcı es-Seyyid Yusuf Ağa b. Mustafa muvâcehesinde Emirler Hân’ı odacısı gāib ani’l-meclis Kirkor v. Atam nâm zimmîye mezbûr es-Seyyid Yusuf Ağa’nın deyni olup emriyle bi-hükmi’l-kefâleti edâ eylediğim üç bin guruş ve gāib ani’l-meclis Peştamâlci Boyacıoğlu Serkiz nâm zimmîden müşterâ mâlımdan mezbûr es-Seyyid Yusuf Ağa’nın iştirâ ve kabz eylediği her birinin ecnâs ve fiyâtı beynimizde ma‘lûm peştamal ve havlu semenlerinden dahi iki bin dokuz yüz guruş ki cem‘an beş bin dokuz yüz guruş mezbûr es-Seyyid Yusuf Ağa zimmetinde alacak hakkım olup lâkin hâlen ve def‘aten bana edâya kudreti olmadığından ben meblağ-ı mecmû‘-ı merkūm beş bin dokuz yüz guruşun şehri âtî gurresinden beher şehr dörder yüz guruşdan on dört ayda beş bin altı yüz guruş ve üç yüz guruşunu dahi on beş ay mürûrunda tamamen bana edâ ve teslîm etmek üzere mezbûr es-Seyyid Yusuf Ağa’yı tecîl ve taksît eylediğimde ol dahi kabûl ve minvâl-i muharrer üzere edâ-i deyne ta‘ahhüd edip bu vechile kat‘-ı münâza‘a eyledik deyü ikrâr ve tasdîkleri tescîl ve İstanbul Mahkemesi’nden huzûr-ı [âlîlerine i‘lâm olundu] Fî 6 min-Ra sene 1258