İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 322 Hüküm no: 277 Orijinal metin no: [103-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Giridli Mustafa’nın sahibi olduğu kasap gediğinin yarısını Kasap Hıristo’ya sattığı Kasab [Ma‘rûz] Hudâvendigâr-ı sâbık müstağrak-ı bihâr-ı rahmet-i Hâlık vâlid-i kesîrü’l-mehâmid-i hazret-i Hilâfet-penâhî mazhar-ı gufrân-ı İlâhî Sultan Gāzi Mahmud Han -aleyhi eltâfü Rabbihi’l-Mennân- hazretlerinin Âsitâne-i aliyye ve Tophâne-i ma‘mûre ve bilâd-ı mahrûse-i sâirede vâki‘ cevâmi‘-i şerîfe ve âsâr-ı hayriye-i sâireleri evkāf-ı celîleleri müstegallâtından Yedikule hâricinde kâin gayrı ez selhhâne-i mîrî on aded ganem selhhânelerinin şerâit-i mu‘teberelerine ri‘âyet şartıyla ikinci selhhâneye merbût kasab sergilerinden mahrûse-i Galata’da Yenicâmi‘ kurbünde vâki‘ ma‘lûmü’l-hudûd bir bâb kasab dükkânı derûnunda mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûmenin nısf hissesine bâ-temessük-i mütevellî yevmî iki akçe icâre-i müeccele ile mutasarrıf olan Giridî Mustafa b. Ali meclis-i şer‘-i münîrde kasab tâifesinden bâ‘isü’l-i‘lâm Hıristo v. Petro zimmî muvâcehesinde hâlâ Kassâbân müdîri es-Seyyid Mehmed Ali Bey ve sâir mazbûtü’l-esâmî kasab ustaları hâzır oldukları hâlde takrîr-i kelâm edip ben sâlifü’l-beyân mutasarrıf olduğum nısf gedik-i merkūmun nısfını yani rub‘ hisse-i âlât-ı merkūmeyi tasarrufumda ibkā edip mâ‘adâ rub‘ hissesini hüsn-i rızâ ve tayyib-i hâtırım ve ferâğ-ı mu‘teber-i kat‘î ile mesfûr Hıristo zimmîye bedel-i ma‘lûm ve makbûz ve müstehlek mukābelesinde bâ-re’y-i mütevellî ferâğ tefvîz eylediğimde ol dahi ber-vech-i muharrer tefevvüz ve kabûl ve hisse-i tevzî‘ini müdîr ve kasab ustaları ma‘rifetleriyle almağa ta‘ahhüd edip fî-mâ ba‘d gedik-i merkūmun rub‘ hissesi mesfûr Hıristo zimmînin hakk-ı müfevvezi olup benim aslâ ve kat‘a alâka ve medhalim kalmamışdır deyü ba‘de’l-ikrâr ve’t-tasdîk gedik-i mezkûrun rub‘ hissesi fâriğ-i mezbûr Giridî Mustafa’nın ferâğından defter-i vakf-ı şerîfde mersûm Hıristo zimmî uhdesine kayd ve der-dest olan temessük-i mezkûrdan ifrâz birle şerh verilip taraf-ı vakfdan müceddeden bir kıt‘a temessük tahrîr ve temhîr ve zabt ü tasarrufi’çün yedine i‘tâ buyurulmak iktizâ eylediği İstanbul Mahkemesi’nden huzûr-ı [âlîlerine i‘lâm olundu] Fî 3 R sene [12]58