İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 323 Hüküm no: 278 Orijinal metin no: [103-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Balıkpazarı’nda bulunan vakıf kasap dükkânı gedik hisselerinin satışı Kasab [Ma‘rûz] Cennet-mekân firdevs-âşiyân Sultan Abdülhamid Han -aleyhi eltâfü Rabbihi’l-Mennân- hazretlerinin evkāf-ı celîleleri müstegallâtından Yedikule hâricinde kâin gayrı ez selhhâne-i mîrî on aded ganem selhhânelerinin şerâit-i mu‘teberelerine ri‘âyet şartıyla üçüncü selhhâneye merbût kasab dükkânlarından mahrûse-i Galata’da Balıkpazarı’nda vâki‘ ma‘lûmü’l-hudûd bir bâb kasab dükkânı derûnunda mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûmenin rub‘ hissesine bâ-temessük-i mütevellî bi’l-icâreteyn mutasarrıf olan mu‘arrefetü’z-zât Âişe Hatun bt. Mustafa meclis-i şer‘-i münîrde kasab tâifesinden bâ‘isiyyü’l-i‘lâm Vasil v. İstavri ve İspiro v. Vasil zimmîler muvâcehelerinde hâlâ Kassâbân müdîri es-Seyyid Mehmed Ali Bey ve sâir mazbûtü’l-esâmî kasab ustaları hâzır oldukları hâlde takrîr-i kelâm edip <> ben ber-vech-i muharrer mutasarrıfe olduğum hisse-i gedik-i merkūmeyi hüsn-i rızâ ve tayyib-i hâtırım ve ferâğ-ı mu‘teber-i kat‘î ile mesfûrân Vasil ve İspiro zimmîlerin ale’l-iştirâki’s-seviyy bedel-i ma‘lûm ve makbûz ve müstehlek mukābelesinde bâ-re’y-i mütevellî ferâğ ve tefvîz eylediğimde onlar dahi ber-vech-i muharrer tefevvüz ve kabûl ve hisse-i tevzî‘ini müdîr ve kasab ustaları ma‘rifetleriyle bi’l-mu‘âyene [almağa] ta‘ahhüd edip fî-mâ ba‘d gedik-i merkūmun rub‘ hissesi mersûmân Vasil ve İspiro zimmîlerin seviyyen hakk-ı müfevvezleri olup benim aslâ ve kat‘a alâka ve medhalim kalmamışdır deyü ba‘de’l-ikrâr ve’t-tasdîk rub‘-ı gedik-i merkūmun fâriğa-i mezbûre Âişe Hatun’un ferâğından defter-i vakf-ı şerîfde mersûmân Vasil ve İspiro zimmîlerin ber-vech-i muharrer iştirâken uhdelerine kayd ve der-dest olan temessük-i mezkûrda Kasab Mehmed b. Mustafa’nın dükkân-ı mezkûr gediğinde âhar rub‘ hissesi dahi münderic ve mastûr olmağla mârrü’l-beyân rub‘ hisse-i âlât-ı gedik-i mezkûr temessük-i merkūmdan ifrâz ve şerh verilip mersûmân Vasil ve İspiro zimmîlerin ale’l-iştirâki’s-seviyy zabt u tasarrufları’çün taraf-ı vakfdan müceddeden bir kıt‘a temessük tahrîr ve temhîr ve yedlerine i‘tâ buyurulmak iktizâ eylediği İstanbul Mahkemesi’nden huzûr-ı [âlîlerine i‘lâm olundu] Fî 3 R sene [12]58