Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 50 Hüküm no: 34 Orijinal metin no: [7a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal’a bağlı Yakacık köyünde Hasan’ın bina ettirdiği mescide minber konulup cami statüsüne kavuşturulması Berat-ı şerîf-i Yakacık mescid-i el-Hâc Hasan Akzâ kuzâti’l-müslimîn e[v]lâ vülâti’l-muvahhidîn ma‘denü’l-fazli ve’l-yakīn râfi‘ü â‘lâmi’ş-şerî‘ati ve’d-dîn vârisü ulûmi’l-enbiyâi ve’l-mürselîn ve’l-muhtassu bi-mezîd-i inayeti’l-meliki’l-mu‘în Üsküdar kādısı mevlânâ ( ) -zîde fezâiluhû- tevkī‘-i refî‘-i hümâyûn vâsıl olıcak ma‘lûm ola ki kazâ-i mezkûre muzâfâtından Kartal nâhiyesine tâbi‘ Yakacık nâm karyede vâki‘ el-Hâc Hasan nâm sâhibü’l-hayrın müceddeden binâ eylediği mescid-i şerîfe minber vaz‘ olunup câmi‘-i şerîf olmağla tahammülü olduğuna binâen işbu dârende-i fermân-ı hümâyûn bânî-i mezbûr el-Hâc Hasan kendü atyeb mâlından mescid-i mezkûra müceddeden minber vaz‘ ve salât-ı Cum‘a ve îdeyn edâ olunmak içün izn-i hümâyûn recâsına istid‘â-yı inâyet etmeğin izn-i hümâyûnum erzânî kılınıp buyurdum ki hükm-i şerîfim vardıkda göresin mescid-i mezkûr eimme-i Hanefiyye -rıdvânullâhi te‘âlâ aleyhim ecma‘în- tecvîz gördükleri mahâlde ise kendü atyeb mâlından müceddeden minber vaz‘ etdirdüp berat-ı şerîfim [ile] hatîb nasb ü ta‘yîn olundukdan sonra evkāt-ı salât-ı Cum‘a ve îdeyn etdiresin şöyle bilüp alâmet-i şerîfe i‘timâd kılalar ve’s-selâm. Tahrîren fî-evâhiri Zilka‘de li-sene semân ve seb‘în ve mi’ete ve elf. Be-makām-ı İslambol