Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 50 Hüküm no: 35 Orijinal metin no: [7a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Halîfe’nin Yakacık köyündeki camiye hatip olarak tayin edilmesi Berat-ı âlîşân el-Hâc Hasan Nişân-ı şerîf-i âlîşân-ı sâmî-mekân-ı Sultânî tuğrâ-yı garrâ-yı cihân-sitân-ı hakānî nüffize bi’l-avni’r-rabbânî hükmü oldur ki Üsküdar muzâfâtından Kartal nâhiyesine tâbi‘ Yakacık nâm karyede vâki‘ ashâb-ı hayrâtdan el-Hâc Hasan nâm sâhibü’l-hayrın izn-i hümâyûnumla müceddeden binâ eylediği câmi‘-i şerîfinde hatîb olmayup nasb ü ta‘yîn olunmak lâzım ve mühim olmağla erbâb-ı istihkākdan işbu râfi‘ü tevkī‘-i refî‘-i hakānî Mevlânâ Hasan Halîfe her vechile lâyık ve mahâll ü müstehak olmağın yevmî iki akçe tevcîh olunup yedine berat-ı şerîf-i âlîşânımın verilmek bâbında istid‘â-yı inâyet etmeğin sadaka edüp bu berat-ı hümâyûnumu verdim ve buyurdum ki ba‘de’l-yevm mevlânâ-yı mezbûr Hasan Halîfe varup zikr olunan câmi‘-i şerîfde hitâbet ve hatîbi olup hizmet-i lâzimesini mer‘î ve müeddî kılındıkdan sonra yevmî iki akçe vazîfesiyle mutasarrıf olup vâki‘ oldukça devâm-ı ömr ü devletim içün du‘âya müdâvemet göstersin ol bâbda taraf-ı âhardan dahl ü ta‘arruz kılmayalar şöyle bilüp alâmet-i şerîfe i‘timâd kılalar. Tahrîren fî-evâhiri Zilka‘de li-sene semân ve seb‘în ve mi’ete ve elf. Be-makām-ı İslambol