İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 411 Hüküm no: 361 Orijinal metin no: [133-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuyumcu Yoseb’in Müslüman mahallesinde satın aldığı üç ev ve bir arsayı Müslüman birine satması İhrâc- şüd fî 8 Ca sene [12]59 Kuyumcu Yoseb zimmînin <> teferruğ eylediği üç bâb menâzil ve arsayı Müslime ferâğ i‘lâmı. [Ma‘rûz] Ashâb-ı arzuhâl mahrûse-i Galata’ya muzâfe kasaba-i Kasımpaşa’da Kamer Hatun Mescid-i şerîfi mahallesi İmâmı İbrahim Efendi b. Mehmed ve muhtârları Mehmed Ağa b. Hasan ve diğer Mehmed Ağa b. Mustafa ve ahâlisinden es-Seyyid Mehmed Efendi b. Ali ve Salih Efendi b. Osman ve el-Hâc Ahmed Ağa b. Hasan ve Tarakçı Ahmed Ağa b. Hüseyin ve Kasab Mustafa Ağa b. Ali ve Lokmacı Halil Ağa b. Mahmud ve Mumcu Mustafa Ağa b. Halil ve Yelkenci Mehmed Ağa b. Hasan ve el-Hâc Osman Ağa b. Hasan ve Ali Efendi b. Abdullah ve sâirleri bi’l-ma‘iyye rü’yete memûr evkāf müfettişi İstanbul pâye-i celîlesiyle mübâhî izzetlü fazîletlü es-Seyyid Mehmed Emin Âsaf Beyefendi hâzır olduğu hâlde Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i münîrde derûn-ı arzuhâlde mastûrü’l-ism Kuyumcu Yoseb v. Yako zimmî muvâcehesinde ahâlisi Müslim olan mahalle-i mezkûrede kâin bâ-irâde-i seniyye Hazîne-i Evkāf-ı Haremeyn-i Muhteremeyn tarafından idâre olunan evkāfdan merhûm Ördek el-Hâc İbrahim Bey Vakfı müsakkafâtından ma‘lûmü’l-hudûd mine’l-kadîm Müslim menzili olmak üzere bir bâb menzile <> müteveffâ Mehmed Reşid Ağa b. Osman’ın sulbiye sagīre kızı Şerife Emine’nin babası müteveffâ-yı mezbûrun intikālinden tasarrufunda iken menzil-i mezkûru vâlidesi ve vasîsi Âişe Hatun bt. el-Hâc Abdullah’dan mersûm Yoseb zimmî sene-i sâbıkā yani bin iki yüz elli yedi senesi Cemâziyelevvel’inin ikinci günü nefsi’çün tefevvüz edip ve kimesne ta‘arruz etmemek için menzil-i mezkûrun temessüğünü İsmail Ağa b. İbrahim ismine tahrîr ettirdip süknâ murâd edip ve yine mahalle-i mezkûrede kâin bâ-irâde-i seniyye Hazîne-i Evkāf-ı Hümâyûn tarafından idâre olunan evkāfdan mescid-i şerîf-i mezkûr vakfı müsakkafâtından kezâlik ma‘lûmü’l-hudûd mine’l-kadîm Müslim menzili olmak üzere diğer bir bâb menzile Mehmed Hoca b. Mustafa ve Hatice Hatun bt. Ali bi’l-icâreteyn münâsafeten mutasarrıflar iken menzil-i mezkûru dahi mutasarrıfları mezbûrândan mesfûr Yoseb zimmî sene-i sâbıkā-i merkūme Zilka‘detü’ş-şerîfesinin dokuzuncu günü kezâlik nefsi’çün tefevvüz edip ve temessüğünü Yusuf Ağa b. Yakub ismine ve yine mahalle-i mezkûrede kâin merhûm Sandalcı el-Hâc Osman Ağa Vakfı müsakkafâtından kezâlik ma‘lûmü’l-hudûd mine’l-kadîm Müslim menzili olmak üzere âhar bir bâb menzile Emine Hatun bt. Ebûbekir bi’l-icâreteyn mutasarrıfe iken menzil-i mezkûru dahi mutasarrıfesi mezbûreden zimmî-i mersûm işbu sene-i mübâreke şehri Rebî‘ülâhirinin sekizinci günü kezâlik kendi için tefevvüz edip ve temessüğünü Yusuf Ağa b. Yakub ismine tahrîr ettirip menzileyn-i mezkûreyni kefere tâifesine îcâr ile derûnlarında iskân murâd edip ve yine mahalle-i mezkûrede kâin merhûm Uzun el-Hâc İbrahim Bey Vakfı’ndan kezâlik ma‘lûmü’l-hudûd mine’l-kadîm Müslim menzili arsası olmak üzere bir bâb menzil arsasına Hanife Hatun bt. Ebûbekir bi’l-icâreteyn mutasarrıfe iken arsa-i mezkûreyi dahi mutasarrıfesi mezbûreden zimmî-i mersûm kezâlik kendi için tefevvüz edip ve temessüğünü İsmail Ağa b. İbrahim ismine tahrîr ettirip üzerine menzil binâ ve kefere tâifesine îcâr ile iskân murâd edip lâkin üç bâb menâzil-i merkūme ve arsa-i mezkûre Müslim mahallesinde ve mine’l-kadîm Müslim süknâları olup taklîl-i cemâ‘ate bâ‘is olmağla suâl olunup mersûm Yoseb zimmî ber-vech-i muharrer süknâ ve iskândan men‘ ve menâzil ve arsa-i merkūmeyi Müslime ferâğa tenbîh olunmak murâdımızdır deyü istid‘â ettiklerinde ol dahi cevâbında kaziyye minvâl-i muharrer üzere olduğunu ve kimesne ta‘arruz etmemek için temessük-i mezkûrları Müslim isimlerine tahrîr ettirdiğini tâyi‘an ikrâr ü i‘tirâf edip bu sûretde menâzil ve arsa-i merkūme Müslim mahallesinde mine’l-kadîm Müslim menâzili olup taklîl-i cemâ‘ate bâ‘is olduğundan mâ‘adâ bâ-irâde-i imâmi’l-Müslimîn sâdır olan fermân-ı adâlet-unvân mantûk-ı münîfi üzere dahi bu makūle Müslim menzili ve arsası kefereye füruht ve ferâğ ve îcâr olunmak memnû‘ olmağla mersûm Yoseb zimmîye üç bâb menâzil-i merkūme ile arsa-i mezkûreyi mütevellîleri re’yleriyle Müslime ferâğ ettirilmek iktizâ eylediği İstanbul Mahkemesi’nden huzûr-ı [âlîlerine i‘lâm olundu] Fî 26 C sene 1258