İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 413 Hüküm no: 363 Orijinal metin no: [134-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hıristo v. Petro’nun tasarrufunda bulunan vakıf kasap gediği hissesini Giridli Mustafa Bey’e sattığı Kasab [Ma‘rûz] Hüdavendigār-ı sâbık müstağrak-ı bihâr-ı rahmet-i Hâlık vâlid-i kesîrü’l-mehâmid-i hazret-i Hilâfet-penâhî mazhar-ı gufrân-ı İlâhî Sultan Gāzi Mahmud Han -aleyhi eltâfü Rabbihi’l-Mennân- hazretlerinin evkāf-ı celîleleri müstegallâtından Yedikule hâricinde kâin gayrı ez selhhâne-i mîrî on aded ganem selhhânelerinin şerâit-i mu‘teberelerine ri‘âyet şartıyla ikinci selhhâneye merbût kasab sergilerinden mahrûse-i Galata’da Yenicâmi‘ kurbünde vâki‘ ma‘lûmü’l-hudûd bir bâb kasab dükkânı derûnunda mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûmenin rub‘ hissesine bâ-temessük-i mütevellî bi’l-icâreteyn mutasarrıf olan Hıristo v. Petro zimmî meclis-i şer‘-i münîrde kasab tâifesinden bâ‘isü’l-i‘lâm Giridî Mustafa Bey b. Ali muvâcehesinde hâlâ Kasablar müdîri es-Seyyid Mehmed Ali Bey ve sâir mazbûtü’l-esâmî kasab ustaları hâzır oldukları hâlde takrîr-i kelâm edip ben âlât-ı gedik-i merkūmdan ber-vech-i muharrer mutasarrıf olduğum rub‘ hisseyi hüsn-i rızâ ve tayyib-i ihtiyârım ve ferâğ-ı mu‘teber-i kat‘î ile mezbûr Giridî Mustafa’ya bedel-i ma‘lûm ve makbûz ve müstehlek mukābelesinde bâ-re’y-i mütevellî ferâğ ve tefvîz eylediğimde ol dahi ber-vech-i muharrer tefevvüz ve kabûl ve hisse-i tevzî‘ini müdîr ve kasab ustaları ma‘rifetleriyle almağa ta‘ahhüd edip fî-mâ ba‘d rub‘ hisse-i merkūmede benim aslâ ve kat‘a alâka ve medhalim kalmayıp mezbûr Giridî Mustafa’nın hakk-ı müfevvezi olmuşdur deyü ba‘de’l-ikrâr ve’t-tasdîk âlât-ı gedik-i merkūmun rub‘ hisse-i merkūmesi fâriğ-i mesfûr Hıristo zimmînin ferâğından defter-i vakf-ı şerîfde mezbûr Giridî Mustafa uhdesine kayd ve der-dest olan temessük-i mezkûru hâmişine zabt ü tasarrufi’çün taraf-ı vakfdan tahrîr ve temhîr ve yedine i‘tâ buyurulmak iktizâ eylediği İstanbul Mahkemesi’nden huzûr-ı [âlîlerine i‘lâm olundu] Fî 25 C sene 1258