Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 472 Hüküm no: 560 Orijinal metin no: [93b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Raziye Hatun Vakfı’na ait binanın icâreteyn yoluyla kiraya verilmesi Mine’l-keşşâf Husûs-ı âti’z-zikrin mahallinde ketb [ve] tahrîri için savb-ı şer‘den bi’l-[il]timâs irsâl olunan Mevlânâ Ebûbekir Efendi b. Abdülkerim mahmiye-i İstanbul’da Bâli Ağa mahallesinde vâki‘ zikri âtî menzile varıp zeyl-i kitâbda muharrerü’l-esâmî müslimîn huzûrlarında akd-i meclis-i şer‘-i mübîn eyledikde merhûm Raziye Hâtun nâm sâhibü’l-hayrın vakf ve evlâdiyyet ve meşrûtiyyet üzre bi’l-fi‘l mütevellî olan es-Seyyid Mustafa Çelebi b. es-Seyyid Mustafa meclis-i ma‘kūd-ı mezbûrda bi’t-tevliyye takrîr-i kelâm ve ta‘bîr ani’l-merâm edip işbu bir tarafdan ba‘zan saka Yusuf ve ba‘zan yoğurtçu Mustafa menzilleri ve iki tarafdan Mustafa Çelebi menzil[i] ve bir tarafdan tarîk-i âm ile mahdûd ve fevkānî ve tahtânî dört bâb köhne oda ve bi’r-i mâ ve cüneyneyi müştemil menzilin tasarrufu mezbûre Raziye Hâtun’un evlâd-ı evlâdına meşrûta vakfı ve ben merkūm-ı mezbûrenin evlâd-ı evlâdından olup menzil-i mezbûrun tasarrufu ber mûceb-i şart-ı vâkıf hakk-ı meşrûtam olmağın lâkin menzil-i mezbûrun devr-i eyyâm ile müşrif-i harâb ve mâil-i türâb [ve] cânib-i vakfımdan binâ ve ta‘mîre müsâ‘id olmamağla icâre-i mu‘accele ve müeccelem misli ile âhar[a] îcâr olunmak cânib-i vakfa her vechile evlâ [ve] enfa‘ olmağın husûs-ı mezbûr vukūf-ı tâmmı olan mahalle-i mezbûre ahâlîsinden istihbâr olunup haberleri tahrîr ve ber vech-i muharrer âhara îcâr kıbel-i şer‘den bana izin verilmek matlûbumdur dedikde husûs-ı merkūma vukūf-ı tâmmı olup mahalle-i mezbûr ahâlîsinden kemhacı Ahmed Çelebi b. Hasan ve Osman Çelebi b. Nurullah ve Mustafa Çelebi [b.] Hüseyin nâm kimesnelerden istihbâr olundukda fi’l-hakīka işbu hudûd-ı mezbûr ile mahdûd olan mârrü’z-zikr menzilin tasarrufu merhûm-ı mezbûr Raziye Hâtun evlâd-ı evlâdına meşrûta vakıf ve menzil-i mezbûr es-Seyyid Mustafa Çelebi merhûm-ı mezbûrenin evlâd-ı evlâdından olup menzil-i merkūm mürûr-ı eyyâm [ile] müşrif-i harâb ve mâil-i türâb olup cânib-i vakıfdan binâ ve ta‘mîre müsâ‘ade olmamağla icâre-i mu‘accele ve müeccele misli ile âhara îcâr olunmak cânib-i vakfa her vechile evlâ ve enfa‘dır deyû her biri haber vermeğin vâki‘ hâli Mevlânâ-yı mezbûr mahallinde ketb [ve] tahrîr edip ba‘dehû ma‘an ba‘s olunan Receb b. Şaban ve Mehmed b. Ahmed ile meclis-i şer‘a gelip alâ vukū‘ihî inhâ ve takrîr etmeğin menzil-i mezbûru ber vech-i muharrer âhara îcâre misli [ile] şer‘den mütevellî-i mezbûra izin vermeğin mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Es-Seyyid Efendi b. Mehmed Efendi, Süleyman Çelebi b. Mehmed, İsâ b. Maden, Mustafa Çelebi b. Mehmed Beşe.