Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 474 Hüküm no: 562 Orijinal metin no: [94a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine bt. Abdullah’ın câriye davasının reddi Mahmiye-i İstanbul’da Kadı çeşmesi kurbunda sâkine Siyavuş Emine bt. Abdullah nâm hâtun ba‘de’t-ta‘rîfi’ş-şer‘î meclis-i şer‘-i şerîf-i enverde işbu râfi‘ü’l-kitâb Mehmed Bey b. Mahmud mahzarında üzerine da‘vâ ve takrîr-i kelâm edip bundan akdem cins ve evsâfı beynimizde ilm-i şer‘î ile ma‘lûm bir câriyeyi yüz altmış esedî guruşa gāib ani’l-meclis Cafer Çavuş nâm kimesneye bey‘ ve teslîm ol dahi iştirâ ve kabûl ve kabz eylediğinden sonra semen-i mezkûr yüz altmış guruşu bana teslîm etmeğin câriye-i mezkûreyi merkūm Mehmed Bey semen-i makbûza bey‘ ve teslîm edip gaybet etmeğin ben semen-i mezkûru merkūm Cafer’den vech-i meşrûh ahz edememekle câriye-i mezbûreyi mezkûr Mehmed Bey’den taleb ederim suâl olunsun dedikde mezkûre Emine, mezkûr [Mehmed] Bey’in iştirâ eylediği câriyeyi mukaddemâ gāib-i mezbûr Cafer Çavuş’a bey‘-i kat‘î ile bey‘ ve teslîmini i‘tirâf etmekle câriye-i mezbûru mezkûr Mehmed Bey’den taleb nâ-meşrû‘ olmağla mezbûr Mehmed Bey’e suâl dahi teveccüh etmeyip mezkûr Emine bî-vech mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Şa‘bâni’l-mu‘azzam li sene seb‘a ve tis‘în ve elf. [94b] Şuhûdü’l-hâl: Mustafa Efendi b. Ramazan, es-Seyyid Hüseyin b. ( ).