İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 512 Hüküm no: 447 Orijinal metin no: [175-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’dan mahlûl kalan kasap gediği hissesinin Kasaplar Kethudası Mehmed Bey adına tescil edildiği İşbu üç kıt‘a kasab i‘lâmlarında sehv vâki‘ olmağla beş varak aşağı sahîhan kayd olunmuşdur. [Ma‘rûz] <> nısf hissesine bâ-temessük-i mütevellî bi’l-icâreteyn <> mutasarrıf olan mezbûr Kasab Ali bundan akdem fevt olup nısf hisse-i mezkûre sulbî kebîr oğlu müvekkil-i mezbûr Mehmed Ağa ve kebîre kızı Hatice Hatun’a hasbe’l-âde seviyyen intikāl ettikden sonra bu esnâda mezbûre Hatice Hatun dahi bilâ-veled fevt olmağla ber-minvâl-i muharrer intikālen mutasarrıfe olduğu rub‘ hisse-i gedik-i mezkûr mahlûl ve cânib-i vakf-ı şerîfe âid ve râci‘ oldukdan sonra hisse-i mezkûreleri lede’l-müzâyede ve inkıtâ‘u’r-rağbe iki bin guruşda <<âlât-ı gedik-i merkūmun rub‘ hissesine kezâlik mutasarrıfe olan karındaşı>> müvekkil-i mezbûr Mehmed Ağa üzerinde karâr ve ziyâde ile tâlib-i âharı zuhûr etmeyip ve meblağ-ı mezkûr hisse-i merkūmenin el-yevm mu‘accele-i misli idiği ihbâr olundukdan sonra hisse-i mezkûreyi meblağ-ı merkūm iki bin guruş icâre-i mu‘accele ve icâre-i müeccele-i kadîmesiyle mezbûr Mehmed Ağa’ya îcâr ve vech-i lâyıkı üzere teslîm eylediğimde ol dahi ber-minvâl-i istîcâr ve tesellüm ve kabz ü kabûl etmekle mu‘accele-i mezkûre iki bin guruşu vekîli mezbûr es-Seyyid Ebûbekir Ağa yedinde olan ilmühaber tezkiresi mûcebince Hazîne-i Evkāf-ı Hümâyûn tarafına def‘ ü teslîm ve emriyle umûr-ı vakf-ı şerîfe sarf ve istihlâk olunmağla fî-mâ ba‘d rub‘ hisse-i âlât-ı gedik-i mezkûr dahi mezbûr Mehmed Ağa’nın dâhil-i havza-i tasarrufu olmuşdur deyü ba‘de’l-ikrâr ve’t-tasdîk bu sûretde gedik-i mezkûrun rub‘ hissesi vech-i meşrûh üzere babası müteveffâ-yı mezbûr Kasab Ali’nin müteveffât-ı mezbûre Hatice Hatun’un mahlûlünden defter-i vakf-ı şerîfde mezbûr Mehmed Ağa uhdesine kayd ü zabt ve tasarrufi’çün müceddeden bir kıt‘a temessük tahrîr ü temhîr ve yedine i‘tâ olunmak iktizâ eylediği İstanbul Mahkemesi’nden huzûr[-ı âlîlerine i‘lâm olundu]>> Fî 29 N sene 1258