İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 512 Hüküm no: 446 Orijinal metin no: [174-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çubukçu Osman Ağa’nın Tatos zimmîye açtığı alacak davasında sulh olup alacağının taksitler halinde ödenmesini kabul ettiği [Ma‘rûz] Çubukçu esnâfından sâhib-i arzuhâl Osman Ağa b. Yahya meclis-i şer‘-i enverde yine esnâf-ı mezkûreden derûn-ı arzuhâlde mastûrü’l-ism Tatos v. Mahas zimmî muvâcehesinde mersûm Tatos zimmî zimmetinde sene-i sâbıkā hilâlinde beher bini yüz beşer guruşa olmak üzere mâlımdan ve yedimden iştirâ ve kabz eylediği doksan altı bin aded zıvanalık kirişin [175] çubuk semenlerinden yedi bin iki yüz kırk beş guruş ve beher yüzü yirmişer guruşa olarak kezâlik mâlımdan ve yedimden iştirâ ve kabz eylediği dokuz yüz aded silmelik kızılcık ağacı semenlerinden dahi yüz seksen guruş ki cem‘an yedi bin dört yüz yirmi beş guruş alacak hakkım olup bin üç yüz kırk beş guruşunu bana edâ etmekle bâkīsi olan altı bin seksen guruşu mesfûr Tatos zimmîden hâlâ taleb ederim deyü tasaddî eylediğim da‘vâmdan bâ-tavassut-ı muslihîn zimmî-i mersûm ile kat‘an-li’n-nizâ‘ dört bin iki yüz doksan beş guruş üzerine bi’t-terâzî ba‘de akdi’l-musâlaha ve’l-kabûl bedel-i sulh-ı mezkûrdan mâ‘adâ ziyâde müdde‘âma ve bi’l-cümle husûs-ı mezkûra ve işbu târih-i i‘lâma gelince sâir cemî‘ hukūk-ı şer‘iyeye müte‘allika âmme-i de‘âvîden tarafeynden her birimiz âharın zimmetini kabûlümüzü hâvî ibrâ-i âmm-ı sahîh-i şer‘î ile ibrâ ve iskāt eylediğimizden mâ‘adâ ibrâdan müstesnâ bedel-i sulh-ı mezkûr dört bin iki yüz doksan beş guruşun târih-i i‘lâmdan yirmi bir gün mürûrunda bin guruşunu ve yirmi bir gün mürûrundan sonra dört ay hitâmında dahi üç bin iki yüz doksan beş guruşunu tamamen bana edâ ve teslîm etmek üzere mersûm Tatos zimmîyi tecîl ve taksît eylediğimde ol dahi kabûl ve ber-vech-i muharrer edâ-i deyne ta‘ahhüd edip bu vechile kat‘-ı münâza‘a eyledik deyü ikrâr ve tasdîkleri tescîl ve İstanbul Mahkemesi’nden huzûr[-ı âlîlerine i‘lâm olundu] Fî 29 Ş sene 1258