İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 514 Hüküm no: 449 Orijinal metin no: [175-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’dan mahlûl kalan kasap gediği hissesinin Kasaplar Kethudası Mehmed Bey adına tescil edildiği Kezâlik selhhâne-i mîrî medîne-i Üsküdar’da İcadiye nâm mahâlde vâki‘ ma‘lûmü’l-hudûd bir bâb kasab dükkânı derûnunda mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûmenin sümün hissesine bâ-temessük-i mütevellî bi’l-icâreteyn mutasarrıfe olan müvekkil-i mezbûr Mehmed Ağa’nın li-ebeveyn kız karındaşı Hatice Hatun bundan akdem bilâ-veled fevt olmağla ber-minvâl-i muharrer mutasarrıfe olduğu sümün hisse-i mezkûre mahlûl ve cânib-i vakf-ı şerîfe âid ve râci‘ oldukdan sonra hisse-i mezkûre lede’l-müzâyede ve inkıtâ‘u’r-rağbe beş yüz guruşda âlât-ı gedik-i merkūmun diğer sümün hissesine mutasarrıf olan karındaşı müvekkil-i mezbûr Mehmed Ağa [176] üzerinde karâr ve ziyâde ile tâlib-i âharı zuhûr etmeyip ve meblağ-ı mezkûr hisse-i merkūmenin el-yevm mu‘accele-i misli idiği ihbâr olundukdan sonra hisse-i mezkûreyi meblağ-ı merkūm beş yüz guruş icâre-i mu‘accele ve icâre-i müeccele-i kadîmesiyle bi’l-vekâle müvekkil-i mezbûr Mehmed Ağa’ya îcâr ve vech-i lâyığı üzere teslîm eylediğimde ol dahi ber-minvâl-i muharrer istîcâr ve tesellüm ve kabz ve kabûl etmekle mu‘accele-i mezkûre beş yüz guruşu vekîli mezbûr es-Seyyid Ebûbekir Ağa yedinde olan ilmühaber tezkiresi mûcebince Hazîne-i Evkāf-ı Hümâyûn tarafına def‘ ve teslîm ve emriyle umûr-ı vakf-ı şerîfe sarfla istihlâk olunmağla fî-mâ ba‘d sümün hisse-i âlât-ı gedik-i mezkûr dahi mezbûr Mehmed Ağa’nın dâhil-i havza-i tasarrufu olmuşdur deyü ba‘de’l-ikrâr ve’t-tasdîk bu sûretde <> gedik-i mezkûrun sümün hissesi vech-i meşrûh üzere müteveffât-ı mezbûre Hatice Hatun’un mahlûlünden defter-i vakf-ı şerîfde mezbûr Mehmed Ağa uhdesine kayd ü zabt ve tasarrufi’çün müceddeden bir kıt‘a temessük tahrîr ve temhîr ve yedine i‘tâ buyurulmak iktizâ eylediği İstanbul Mahkemesi’nden huzûr[-ı âlîlerine i‘lâm olundu] Fî 29 N sene 1258