İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 515 Hüküm no: 450 Orijinal metin no: [176-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’dan mahlûl kalan kasap gediği hissesinin Kasaplar Kethudası Mehmed Bey adına tescil edildiği Kasab [Ma‘rûz] Kezâlik selhhâne-i mîrî[den olup] yedinci selhhâneye merbût kasab dükkânlarından medîne-i Üsküdar’da Köprübaşı nâm mahâlde vâki‘ ma‘lûmü’l-hudûd bir bâb kasab dükkânı derûnunda mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûmenin rub‘ hissesine bâ-temessük-i mütevellî bi’l-icâreteyn mutasarrıfe olan müvekkil-i mezbûr Mehmed Ağa’nın li-ebeveyn kız karındaşı Hatice Hatun bundan akdem bilâ-veled fevt olmağla ber-minvâl-i muharrer mutasarrıfe olduğu rub‘ hisse-i mezkûr mahlûl ve cânib-i vakf-ı şerîfe âid ve râci‘ oldukdan sonra hisse-i mezkûre lede’l-müzâyede ve inkıtâ‘u’r-rağbe bin guruşda âlât-ı gedik-i merkūmun diğer rub‘ hissesine kezâlik mutasarrıf olan karındaşı müvekkil-i mezbûr Mehmed Ağa üzerinde karâr ve ziyâde ile tâlib-i âharı zuhûr etmeyip ve meblağ-ı mezbûr hisse-i merkūmenin el-yevm mu‘accele-i misli idiği ihbâr olundukdan sonra hisse-i mezkûresi meblağ-ı merkūm bin guruş icâre-i müeccele [mu‘accele] ve icâre-i müeccele-i kadîmesiyle bi’l-vekâle müvekkil-i mezbûr Mehmed Ağa’ya îcâr ve vech-i lâyıkı üzere teslîm eylediğimde ol dahi ber-minvâl-i muharrer istîcâr ve kabz ve kabûl etmekle mu‘accele-i mezkûre bin guruşu vekîl-i mezbûr es-Seyyid Ebûbekir Ağa yedinde olan ilmühaber tezkiresi mûcebince Hazîne-i Evkāf-ı Hümâyûn tarafına def‘ ve teslîm ve emriyle umûr-ı vakf-ı şerîfe sarfla istihlâk olunmağla fî-mâ ba‘d rub‘ hisse âlât-ı gedik-i mezkûr dahi mezbûr Mehmed Ağa’nın havza-i tasarrufu olmuşdur deyü ba‘de’l-ikrâr ve’t-tasdîk bu sûretde gedik-i mezkûrun rub‘ hissesi vech-i meşrûh üzere müteveffât-ı mezbûre Hatice Hatun’un mahlûlünden defter-i vakf-ı şerîfde mezbûr Mehmed Ağa uhdesine kayd ü zabt ve tasarrufi’çün müceddeden bir kıt‘a temessük tahrîr ve temhîr ve yedine i‘tâ buyurulmak iktizâ eylediği İstanbul Mahkemesi’nden huzûr[-ı âlîlerine i‘lâm olundu] Fî 2 N sene [12]58