İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 536 Hüküm no: 471 Orijinal metin no: [184-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vakıf tönbeki dükkânına ait hisse satışı Tönbekici dükkânı ferâğı [Ma‘rûz] Derûn-ı arzuhâlde ismi mastûr Sarrâf Simyon v. Yuvan zimmî bi’l-ma‘iyye rü’yete memûr evkāf müfettişi İstanbul pâye-i celîlesiyle mübâhî izzetlü fazîletlü es-Seyyid Mehmed Emin Âsaf Beyefendi hâzır olduğu hâlde evvelen Çarşamba günü huzûr-ı hazret-i Fetvâ-penâhî’de ve ba‘dehû şifâhen sâdır olan fermân-ı âlîlerine imtisâlen müfettiş-i mûmâ-ileyh tarafından meb‘ûs Mehmed İzzet Efendi hâzır olduğu hâlde bâb-ı cenâb-ı müşârün-ileyhde İstanbul kādıları dâ‘îlerine tahsîs buyurulan dâirede ma‘kūd meclis-i şer‘-i hatîrde arzuhâl sâhibelerinden Prosini bt. Sarrâf Yuvan v. Matos Nasrâniye tarafından husûs-ı âti’l-beyânda vekîl olduğu şahsını bilirler Yamandi v. Simyon ve Hıristo v. Kostandi nâm zimmîler şehâdetleriyle sâbit ve müvekkile-i mersûmenin li-ebeveyn kız karındaşları Eleniko ve Poliksan Nasrâniyeler taraflarından dahi kezâlik husûs-ı âti’l-beyânda vekîl-i müseccelleri olan Kuyumcu Yorgi v. Mihal zimmî muvâcehesinde bâ-irâde-i seniyye Hazîne-i Evkāf-ı Haremeyn-i Muhteremeyn tarafından idâre olunan evkāfdan İstanbul’da vâki‘ merhûm Mahmudpaşa Câmi’-i şerîfi müsakkafâtından câmi’-i şerîf-i mezkûr civârında yağhâne sûkunun alt başında kâin ma‘lûmü’l-hudûd bir bâb mukaddemâ kürkcü ve el-yevm tönbekici dükkânının bâ-temessük-i mütevellî bi’l-icâreteyn mutasarrıf olduğum rub‘ hisse-i şâyi‘asını hüsn-i rızâ ve tayyib-i hâtırım ve ferâğ-ı mu‘teber-i kat‘î ile müvekkilât-ı mersûmât Prosini ve Eleniko ve Poliksan Nasrâniyelere alâ-iştirâki’s-seviyy beş yüz guruş bedel-i makbûz ve müstehlek mukābelesinde bâ-re’y-i mütevellî ferâğ ve tefvîz ve vech-i lâyıkı üzere teslîm eylediğimde onlar dahi ber-vech-i muharrer tefevvüz ve kabûl edip fîmâ-ba‘d dükkân-ı mezkûrun rub‘ hisse-i şâyi‘a-i merkūmesi müvekkilât-ı mesfûrâtın seviyyen dâhil-i havza-i tasarrufları olup benim aslâ ve kat‘a alâka ve medhalim kalmamağla bi’l-cümle husûs-ı mezkûra müte‘allika âmme-i da‘vâdan ben müvekkilât-ı mersûmât Prosini ve Eleniko ve Poliksan Nasrâniyelerin zimmetlerini ve vekîl-i mersûm Yorgi zimmî dahi benim zimmetimi her birimiz ibrâ-i sahîh-i şer‘î ile bi’l-asâle ve bi’l-vekâle ibrâ ve iskāt ve tarafeynden her birimiz ber-vech-i muharrer âharın ibrâsını asâleten ve vekâleten kabûl edip bu vechile külliyen kat‘-ı münâza‘a eyledik deyü ikrâr ve tasdîkleri tescîl ve huzûr-ı âlîlerine i‘lâm olundu. Fî 18 L sene 1258