İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 535 Hüküm no: 470 Orijinal metin no: [183-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi esnafından Babik v. Hazar ve ortağı Asador v. Markar’ın Sarraf Bağdisar ve oğlu hakkındaki alacak iddialarının geçersiz olduğu 57000 [guru]ş gedik nizâ‘ından men‘ [Ma‘rûz] Âsitâne-i aliyye’de vâki‘ ekmekçi tâifesinden arzuhâl sâhibleri Babik v. Hazar ve şerîki Asador v. Markar zimmîler meclis-i şer‘-i hatîrde mübâya‘a sarrâflarından derûn-ı arzuhâlde isimleri mastûr Bağdisar v. Karabet ve sulbî kebîr oğlu Markos zimmîler muvâcehelerinde habbâzân müdîri es-Seyyid İbrahim Edhem Efendi [184] ve Yiğitbaşı İsmail ve sâir mazbûtü’l-esâmî ustabaşıları hâzır oldukları hâlde bâ-irâde-i seniyye Hazîne-i Evkāf-ı Haremeyn-i muhteremeyn tarafından idâre olunan cennet-mekân merhûm ve mağfiret-nişân hazret-i Sultan Ahmed Hân-ı evvel -aleyhi rahmeti’l-Meliki’l-âlâ- evkāf-ı şerîfeleri müstegallâtından İstanbul’da Ahmediye Meydanı nâm mahâlde kâin bir bâb vakıf francalacı fırını ve derûnunda mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûme bâ-temessük-i mütevellî bi’l-icâreteyn münâsafeten taht-ı tasarrufumuzda iken işbu sene-i mübâreke Cumâdelâhiresinin yirmi birinci günü ber-vech-i muharrer mutasarrıf olduğumuz fırın ve âlât-ı gedik-i merkūmların nısf hisse-i şâyi‘alarını uhdemizde ibkā edip mâ‘adâ nısf hisse-i şâyi‘alarını mersûmân Bağdisar ve oğlu Markos zimmîlere ale’l-iştirâki’s-seviyy elli yedi bin guruş bedel mukābelesinde bâ-izn-i mütevellî ferâğ ve tefvîz eylediğimizde onlar dahi ber-vech-i muharrer tefevvüz ve kabûl ettiklerinden mâ‘adâ müşterek mâlımız olup fırın-ı mezkûrda olan ma‘lûmü’l-mikdâr dakīk ve hatab ve sâir eşyâ-i ma‘lûmemizi dahi bi-safkatin vâhidetin on sekiz bin beş yüz <> on iki guruşa sarrâfân-ı mesfûrâna seviyyen bey‘ ü teslîm ve bâ-defter-i müfredât ma‘lûmü’l-esâmî kimesneler zimmetlerinde alacak hakkımız olan on beş bin yedi yüz seksen üç buçuk guruş dokuz parayı dahi kabza ve makbûzları olan meblağ-ı merkūm on beş bin yedi yüz seksen üç buçuk guruş dokuz para ve semen-i mezkûr on sekiz bin beş yüz on iki guruş ve bedel-i merkūm elli yedi bin guruş ki cem‘an doksan bir bin iki yüz doksan beş buçuk guruş dokuz parayı cem‘an ol-mikdâr guruş dâyinlerimiz yine bâ-defter-i müfredât ma‘lûmü’l-esâmî kimesnelere deynlerimize mahsûben edâ ve teslîme hâzır-ı müdîr-i mûmâ-ileyh ve sâir hâzırûn-ı mezbûrûn ma‘rifetleriyle sarrâfân-ı mezbûrâna emir ve tarafımızdan tevkîl eylediğimizde onlar dahi ber-vech-i muharrer iştirâ ve kabz ve vekâlet-i mezkûreyi kabûl ettiklerinden sonra beher şehr üçer bin guruş taksît ile deyn-i mezkûrumuzu edâ murâd ettiklerinde dâyinlerimiz dahi râzılar olmayıp ziyâde mutâlebe ettiklerinden mersûmân Bağdisar ve Markos zimmîler nısf hisse-i şâyi‘a-i merkūmeleri ber-vech-i muharrer tefevvüz ve eşyâ-i muharrere-i mezkûreyi dahi minvâl-i muharrer üzere şirâlarına nâdim ve peşîmân olmalarıyla henüz nısf hisse-i şâyi‘a-i merkūmeler defter-i vakf-ı şerîfde uhdelerine kayd ile taraf-ı vakfdan zabt ü tasarrufları’çün temessük tahrîr ve temhîr ve yedlerine i‘tâ dahi olunmayıp ve sarrâfân-ı mersûmân zimem-i merkūmeden dahi nesne kabz etmeden sarrâfân-ı mersûmân fırın ve gedik-i mezkûrların nısf hisse-i şâyi‘a-i merkūmelerinden bâ-re’y-i mütevellî keff-i yed edip biz kemâ-kân zabt eylediğimizden gayrı bey‘-i mezkûru dahi bi’t-terâzî beynimizde fesh ü ikāle birle mebî‘-i mezkûru bize tamamen redd ü teslîm etmişler ise de mücerred mukaddemâ nısf hisse-i şâyi‘amızın ve gedik-i merkūmları meblağ-ı merkūm elli yedi bin guruş mukābelesinde ber-vech-i muharrer tefevvüz etmeleriyle öyle olucak bedel-i merkūm elli yedi bin guruşu bize verip nısf hisse-i şâyi‘a-i merkūmeleri zabt etmek üzere mersûmân Bağdisar ve Markos zimmîlere cebr olunmak murâdımızdır deyü evkāf-ı celîle-i mezkûre kāimmakām-ı mütevellîsi ecille-i ricâl-i Devlet-i aliyyeden hâlâ Evkāf-ı Hümâyûn Nâzırı sa‘âdetlü atûfetlü Mustafa Kânî Beyefendi taraflarından mürsel vekîlleri Câbî-i vakf Mehmed Eşref Efendi b. Mustafa hâzır olduğu hâlde takrîr-i meşrûhu üzere tasaddî eyledikleri da‘vâları şer‘an ve kānûnen ve nizâmen mesmû‘a ve iltifâta şâyân olmadığı müdde‘iyân-ı mersûmân Babik ve şerîki Asador zimmîlere tefhîm ve mûcebince da‘vâ-yı mezkûreleriyle mesfûrân Bağdisar ve Markos zimmîlere bî-vech <<şer‘î>> mu‘ârazadan men‘ olundukları İstanbul Mahkemesi’nden huzûr-ı [âlîlerine i‘lâm olundu] Fî 14 L sene 1258