İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 540 Hüküm no: 475 Orijinal metin no: [186-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sabuncu Mina’nın çeşitli kişilere olan borç ödemelerinin ertelendiği 9950 [guru]ş tecîl Ma‘rûz Sabuncu Mina v. İstavri nâm zimmînin Bâb-ı âlîlerine takdîm eylediği arzuhâline sâdır olan fermân-ı âlîlerine imtisâlen ber-vech-i âtî dâyinleri derûn-ı arzuhâl-i mezkûrda isimleri mastûr Tütüncü Anaştaş v. Bratomos ve Sabuncu Küfecisi Kiryako v. Apostol ve Bahçevân Madenli Yuvan v. Lefter zimmîlerden her biri meclis-i şer‘-i hatîrde mersûm Mina zimmî muvâcehesinde mersûmûndan mesfûr Anaştaş zimmî benim mersûm Mina zimmî zimmetinde cihet-i karzdan beş bin iki yüz elli guruş ve mersûm Kiryako zimmî benim dahi mersûm Mina zimmî zimmetinde yedi sene müddet eylediğim hizmet için iktizâ eden dört bin iki yüz elli guruş ecr-i müsemmâmdan bâkī üç bin yedi yüz guruş ve mersûm Yuvan zimmî benim dahi mersûm Mina zimmî zimmetinde cihet-i karzdan bâ-tahvîl bin guruş ki cem‘an dokuz bin dokuz yüz elli guruş alacak hakkımız olup lâkin medyûnumuz mersûmun hâlen ve def‘aten bize edâ-i deyne iktidârı olmamağla bâ-istimhâl meblağ-ı mecmû‘-ı merkūm dokuz bin dokuz yüz elli guruşu işbu târih-i i‘lâmdan dört sene mürûrunda tamamen bize edâ ve teslîm etmek üzere mersûm Mina zimmîyi imhâl ve tehîr eylediğimizde ol dahi kabûl ve minvâl-i muharrer üzere edâ-i deyne ta‘ahhüd edip bu vechile kat‘-ı münâza‘a eyledik deyü ikrâr ve tasdîkleri tescîl ve İstanbul Mahkemesi’nden huzûr-ı âlîlerine i‘lâm olundu. Fî 6 N sene 1258