İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 541 Hüküm no: 476 Orijinal metin no: [186-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bostan kirasına zam yapılması Bostan icâresi zammı [Ma‘rûz] Arzuhâl sâhibleri zikri âtî bostanın sülüsân hisse-i şâyi‘asına bâ-temessük-i mütevellî bi’l-icâreteyn mutasarrıf olan Çukacı Karakaş Avram v. Yasef nâm Yahûdî tarafından husûs-ı âti’l-beyânda vekîl-i müsecceli Agasi v. Vartan zimmî ve sülüs hisse-i şâyi‘asına kezâlik bi’l-icâreteyn mutasarrıf olan Dellâl Hayim v. Mosi v. Yasef nâm Yahûdî tarafından husûs-ı câi’z-zikrde vekîl olduğu Yako v. Mosi ve Avram v. Hayim nâm Yahûdîler şehâdetleriyle sâbit olan İsak v. Ellaz nâm Yahûdîden her biri şifâhen sâdır olan fermân-ı âlîlerine imtisâlen bi’l-ma‘iyye rü’yete memûr evkāf müfettişi İstanbul pâye-i celîlesiyle mübâhî izzetlü fazîletlü es-Seyyid Mehmed Emin Âsaf Beyefendi hâzır olduğu hâlde Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i hatîrde derûn-ı arzuhâlde isimleri mastûr Bahçevân Vasil zimmî ve şahısları mu‘arrefeler Anaştaşya ve Eleniko Nasrâniyeler evlâdü’l-hâlik Sotiri nâm-ı diğer Sorbin v. Hıristo zimmî ve li-ebeveyn er ve kız karındaşları sagīre Nikola ve sagīre Kalo’nun anaları ve tesviye-i umûrlarına kıbel-i şer‘den mansûbe vasîleri kezâlik şahsı mu‘arrefe Marya bt. Yani Nasrâniye ile Nikola v. Marki zimmî muvâcehelerinde bâ-irâde-i seniyye Hazîne-i Evkāf-ı Hümâyûn tarafından idâre olunan evkāfdan Sadrazam-ı esbak merhûm Merzifonî Kara Mustafa Paşa Vakfı’nın bi’l-meşrûta mütevellîsi Mehmed Said Bey b. Mustafa ve zübde-i urefâ-i Bektâşî Yahya Efendi -kuddise sırruhû- Vakfı’nın bi’l-meşrûta mütevellîsi [mütevelliyesi] mu‘arrefetü’z-zât Şerife Necibe Hanım bt. Mehmed hâzır <> oldukları hâlde mahrûse-i Galata’ya muzâfe Ortaköy’de Dereiçi nâm mahâlde vâki‘ bir tarafdan ba‘zan tarîk-i hâs ve Bahçevânbaşı Portakaloğlu Karabet zimmî bahçesi ve bir tarafdan çiftlik tarîki ve bir tarafdan ba‘zan Hânende Bogos zimmî menzili bahçesi ve ba‘zan Yenimahalle tarîki ve taraf-ı râbi‘i ba‘zan Katırcıoğlu Karabet ve Kolancı Kostandi zimmîler arsaları ve ba‘zan müvekkillerimiz mersûmân Karakaş Avram ve Hayim Yahûdîlerin merhûm-ı müşârün-ileyh Merzifonî Karamustafa Paşa Vakfı müsakkafâtından bi’l-icâreteyn iştirâken mutasarrıf oldukları menzil ile mahdûd ve yine vakf-ı mezkûr müstegallâtından ma‘rifet-i şer‘ ve sâdır olan <> emr-i âlîye imtisâlen ebniye-i hâssa müdîri efendi bendeleri ma‘rifetiyle mu‘âyene ve misâha olunan zikri âtî terbî‘an altmış üç zirâ‘ vakıf mahâlden mâ‘adâ kezâlik mu‘ayene olunup senevî ellişer guruş mülk olan bir bâb vakıf sebze bostanı ber-minvâl-i meşrûh müvekkillerimiz Yahûdîyân-ı mesfûrânın tasarruflarında ve derûnunda mevcûde beyne’l-esnâf gedik ta‘bîr olunur müşârün-ileyh Yahya Efendi Vakfı müstegallâtından âlât-ı lâzıme-i ma‘lûmenin nısf hisse-i şâyi‘ası mesfûrûndan mersûm Nikola zimmînin ve rub‘ hisse-i şâyi‘ası mersûme Marya Nasrâniyenin ve diğer rub‘ hisse-i şâyi‘ası dahi evlâdı mersûmûn Vasil zimmî ve Anaştaşya ve Eleniko Nasrâniyeler ile sagīrân-ı mersûmânın iştirâken ve şâyi‘an bâ-temessük-i mütevellî taht-ı tasarruflarında ve asıl ve vasîyy-i mersûmdan Vasil zimmî ve Anaştaşya ve Eleniko ve Marya Nasrâniyeler ve Niko zimmî bostan-ı mezkûrda kirâ-i mezkûre ile müvekkillerimiz mersûmânın müsâneheten müstecirleri olmağla asıl-ı mersûmûn müvekkillerimiz mersûmânın ber-vech-i muharrer iştirâken mutasarrıf oldukları menzil-i mezkûr verâsında kâin bostan-ı mezkûra muttasıl menzil-i mezkûrun terbî‘an altmış üç zirâ‘ açıklık mahâllini ancak kendileri’çün bundan mukaddem bi-gayrı hakkın fuzûlî zabt etmişler ise de hâlâ bâ-re’y-i mütevellî keff-i yed edip müvekkillerimiz mersûmâna teslîme ta‘ahhüd eylediklerinden mâ‘adâ bostan-ı mezkûrun kirâ-i mezkûresi ecr-i mislinden dûn olduğundan ecr-i misline iblâğ için dahi beynimizde münâza‘ât-ı kesîre vâkı‘a olduğundan asıl ve vasî-i mersûmûn bostan-ı mezkûrun kirâsı olan meblağ-ı merkūm ellişer guruş üzerine yüzer guruş zam ve ecr-i misli idiği bi’l-ihbâr zâhir ve mütehakkık olan yüz elli guruşa <> iblâğ ile bostan-ı mezkûru işbu târih-i i‘lâmdan beher sene meblağ-ı merkūm yüz ellişer guruşa bizden bi’l-asâle ve bi’l-vesâye istîcâr ve kabûl ve sâl be-sâl bilâ-ezâ <> ve müvekkillerimiz mersûmâna edâya ta‘ahhüd biz dahi bostan-ı mezkûru ber-vech-i muharrer taht-ı icârelerinde bi’l-vekâle ibkā edip bu vechile kat‘-ı münâza‘a eyledik deyü ikrâr ve tasâdıkları tescîl ve İstanbul Mahkemesi’nden huzûr-ı [âlîlerine i‘lâm olundu] Fî 23 min-Ra sene 1258