İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 550 Hüküm no: 482 Orijinal metin no: [189-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Miras yoluyla intikal eden vakıf kasap dükkânları gediklerinin devir ve satış işlemleri Kasab [Ma‘rûz] Kezâlik vakıf âlât-ı lâzıme-i ma‘lûmelerin her biri beşer sehm i‘tibârıyla bir sehmin nısf hisselerine bâ-temessük-i mütevellî bi’l-icâreteyn mutasarrıf olan Yanaki v. Kiro zimmî bundan akdem hâlik olup ber-vech-i meşrûh mutasarrıf olduğu nısf an-hums hisseler sulbî kebîr oğulları Kosti ve Petro zimmîler ile kebîre kızları olup hâlâ vilâyet-i Rumeli’de medîne-i Ergirikasrı’ya muzâfe Lench nâhiyesine tâbi‘ Kesturat karyesinde mütemekkineler Zobiçe ve Kaço Nasrâniyelere hasbe’l-âde irbâ‘an intikāl eylediğini hâlâ kasablar kethudâsı es-Seyyid Mehmed Bey ile mazbûtü’l-esâmî kasab ustaları ihbâr eylediklerinden sonra gāibetân-ı mersûmetân Zobiçe ve Kaço Nasrâniyeler taraflarından husûs-ı âti’l-beyânda bâ-hüccet-i şer‘iye vekîlleri olduğu şahıslarını bilirler karye-i mezkûre re‘âyâsından Sava v. Dimitri ve Aleko v. Calu nâm zimmîler şehâdetleriyle mukaddemâ muvâcehe-i hasm-ı şer‘îde ber-nehc-i şer‘î sâbit olan Hıristaki v. Dino zimmî mersûm Kosti zimmî dahi hâzır olduğu hâlde meclis-i şer‘-i hatîrde kasab tâifesinden bâ‘isü’l-i‘lâm Dino v. Yorgi zimmî tarafından zikri câî husûsda tasdîka vekîl-i şer‘îsi Hafız İsmail Efendi b. Mustafa muvâcehesinde bi’l-vekâle takrîr-i kelâm edip zikr olunan kasab dükkânları gedik âlâtlarından müvekkilelerim gāibetân-ı mersûmetân Zobiçe ve Kaço Nasrâniyeler <> babaları hâlik-i mersûmdan <> âdiyen intikāl eden nısf an-nısfı hums hisseleri ben bi’l-vekâle ve hâzır-ı mersûm Kosti zimmî dahi kendine babası hâlik-i mersûmdan intikāl eden rub‘ an nısf-ı hums hisseleri bi’l-asâle bedel-i ma‘lûm ve makbûz mukābelelerinde müvekkil-i mersûm Dino zimmîye bâ-re’y-i mütevellî ferâğ-ı kat‘î-i mu‘teber ile ferâğ ve tefvîz eylediğimizde ol dahi ber-vech-i muharrer tefevvüz ve kabûl ve hisse-i tevzî‘ini kethudâ ve kasab ustaları ma‘rifetleriyle almağa ta‘ahhüd edip fî-mâ ba‘d nısf ve rub‘ hisse-i merkūmelerde müvekkilelerim gāibetân-ı mersûmetân ile karındaşları asıl hâzır-ı mersûm Kosti zimmînin aslâ ve kat‘a alâka ve medhalleri kalmayıp müvekkil-i mersûm Dino zimmînin dâhil-i havza-i tasarrufu olmuşdur deyü ba‘de’l-ikrâr ve’t-tesâdık zikr olunan gedik âlâtlarının nısf an-nısfı hums hisseleri babaları hâlik-i mersûm Yanaki zimmîden evlâd-ı mersûmûn Kosti ve Petro zimmîler ve Zobiçe ve Kaço Nasrâniyelere ba‘de’l-intikāl ber-minvâl-i muharrer ancak nısf ve rub‘ an-nısfı hums hisse-i merkūmeler vekîl ve asıl-ı mersûmân Hıristaki ve Kosti <> zimmîlerin ferâğlarından defter-i vakf-ı şerîfde müvekkil-i mersûm Dino zimmî uhdesine kayd ve der-dest olan temessük-i mezkûr hâmişine zabt ü tasarrufi’çün tahrîr ve temhîr ve mersûm Petro zimmîye babası hâlik-i mersûmdan intikāl eden diğer rub‘ an-nısfı hums hisseler dahi temessük-i mezkûrdan ifrâz birle şerh verilip zabt ü tasarrufi’çün taraf-ı vakfdan müceddeden bir kıt‘a temessük tahrîr ve temhîr ve yedlerine i‘tâ buyurulmak iktizâ eylediği İstanbul Mahkemesi’nden huzûr-ı [âlîlerine i‘lâm olundu] Fî-selhi L sene 1258