İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 548 Hüküm no: 481 Orijinal metin no: [189-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Miras yoluyla intikal eden vakıf kasap dükkânları gediklerinin devir ve satış işlemleri Kasab Ma‘rûz-ı dâ‘î-i devlet-[i aliyyeleridir ki] Cennet-mekân adn-âşiyân Sultan Abdülhamid Han -aleyhi sicâlü’l-gufrân- hazretlerinin evkāf-ı celîleleri müstegallâtından Yedikule hâricinde kâin gayrı ez selhhâne-i mîrî on aded ganem selhhânelerinin şerâit-i mu‘teberelerine ri‘âyet şartıyla birinci selhhâneye merbût Fındıklı kasabasında vâki‘ bir bâb ve üçüncü selhhâneye merbût Tophâne kasabasında Firuzağa nâm mahâlde vâki‘ bir bâb ve Galata Sarayı kurbünde selhhâne civârında vâki‘ bir bâb ve yine kasaba-i Fındıklı’da köşe başında vâki‘ bir bâb ve Dörtyolağzı’nda vâki‘ bir bâb ve Karaki kapısı kurbünde vâki‘ bir bâb ve Beyoğlu’nda Ketehorya mahallesinde vâki‘ bir bâb ve Ağa Câmi‘i kurbünde vâki‘ bir bâb ve Yazıcı Câmi‘i kurbünde vâki‘ bir bâb ve dördüncü selhhâneye merbût Galata Sarayı kurbünde vâki‘ bir bâb ki cem‘an on bâb kasab dükkânları derûnlarında mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûmelerin her birinden südüs an-nısfı hums hisselerine bâ-temessük bi’l-icâreteyn mutasarrıf olan Yanaki v. Kiro zimmî bundan akdem hâlik olup ber-vech-i meşrûh mutasarrıf olduğu südüs an-nısfı hums hisseler sulbî kebîr oğulları Kosti ve Petro zimmîler ile kebîre kızları olup hâlâ vilâyet-i Rumeli’de Ergirikasrı’ya muzâfe Lench nâhiyesine tâbi‘ Kesturat karyesinde mütemekkineler Zobiçe ve Kaço Nasrâniyelere hasbe’l-âde irbâ‘an intikāl eylediğini hâlâ kasablar kethudâsı es-Seyyid Mehmed Bey ile mazbûtü’l-esâmî kasab ustaları ihbâr ettiklerinden sonra gāibetân-ı mersûmetân Zobiçe ve Kaço Nasrâniye taraflarından husûs-ı âti’l-beyânda bâ-hüccet-i şer‘iye vekîlleri olduğu şahıslarını bilirler karye-i mezkûre re‘âyâsından Sava v. Dimitri ve Aleko v. Cano nâm zimmîler şehâdetleriyle mukaddemâ muvâcehe-i hasm-ı şer‘îde ber-nehc-i şer‘î sâbit olan Hıristaki v. Dino zimmî mersûm Kosti zimmî dahi hâzır olduğu hâlde meclis-i şer‘-i hatîrde kasab tâifesinden bâ‘isü’l-i‘lâm Dino v. Yorgi zimmî tarafından zikri câî husûsda tasdîka vekîl-i şer‘îsi Hafız İsmail Efendi b. Mustafa muvâcehesinde bi’l-vekâle takrîr-i kelâm edip zikr olunan kasab dükkânları gedik âlâtlarından müvekkilem gāibetân-ı mersûmetân Zobiçe ve Kaço Nasrâniyelere babaları hâlik-i mersûmdan âdiyen intikāl eden nısf an-südüs nısfı hums hisseleri ben bi’l-vekâle hâzır-ı mersûm Kosti zimmî dahi kendine babası hâlik-i mersûmdan intikāl eden rub‘ an-südüs nısfı hums hisse-i mezkûreleri bi’l-asâle bedel-i ma‘lûm ve makbûz mukābelelerinde müvekkil-i mersûm Dino zimmîye [bâ] re’y-i mütevellî ve ferâğ-ı kat‘î ile ferâğ ve tefvîz eylediğimizde ol dahi ber-vech-i muharrer tefevvüz ve kabûl ve hisse-i tevzî‘ini kethudâ ve kasab ustaları ma‘rifetleriyle almağa ta‘ahhüd edip fî-mâ [ba‘d] husûs-ı merkūmede müvekkilelerim gāibetân-ı mersûmetân ile karındaşları asıl hâzır-ı mersûm Kosti zimmînin aslâ ve kat‘a alâka ve medhalleri kalmayıp müvekkil-i mesfûr Dino zimmînin dâhil-i havza-i tasarrufu olmuşdur deyü ba‘de’l-ikrâr ve’t-tesâdık zikr olunan gedik âlâtlarının südüs an-nısfı hums hisseleri hâlik-i mersûm Yanaki zimmîden evlâd-ı mersûmûn Kosti ve Petro zimmîler ve Zobiçe ve Kaço Nasrâniyelere ba‘de’l-intikāl Mitro v. Liko nâm zimmînin âlât-ı gedik-i merkūmelerden mutasarrıf olduğu diğer südüs an-nısfı hums hisseler dahi münderic ve der-dest olan temessük-i mezkûrdan ifrâz birle şerh verilerek vech-i meşrûh üzere ancak nısf ve rub‘ hisseler vekîl ve asıl-ı mersûmân Hıristaki ve Kosti zimmîlerin ferâğından ve defter-i vakf-ı şerîfde müvekkil-i mersûm Dino zimmî uhdesine kayd ü zabt ve tasarrufi’çün taraf-ı vakfdan müceddeden bir kıt‘a temessük mersûm Petro zimmîye babası hâlik-i mersûmdan intikāl eden diğer rub‘ an-südüs nısfı hums hisselerin zabt u tasarrufi’çün müceddeden diğer bir kıt‘a temessük tahrîr ü temhîr ve yedlerine i‘tâ buyurulmak iktizâ eylediği İstanbul Mahkemesi’nden huzûr-ı [âlîlerine i‘lâm olundu] Fî-selhi L sene 1258