İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 65 Hüküm no: 15 Orijinal metin no: [3b-1, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Bey b. Abdullah’ın vasiyetlerinin tenfizine vasi atadığı Her ikisi de mahmiye-i Kostantıniyye mahallâtından Mirâhor mahallesi sâkinlerinden olan udûlden Mustafa b. Mehmed ve Solak Mehmed b. Ahmed nâm kimseler meclis-i şer‘-i şerîf ve mahfil-i dîn-i münîfe hâzırân olup, mahalle-i mezbûrede bundan akdem vefât eden Ali Bey b. Abdullah’ın zâhirde vâris-i ma‘rûfu olmadığı ecilden cemî‘ muhallefâtına vâzı‘ü’l-yed olan mahmiye-i mezbûrede vâki‘ Beytü’l-mâl-i hâs emîni olan fahrü’l-akrân Mahmud Ağa mahzarında, hâmil-i hâze’l-kitâb Mehmed Efendi b. Ali el-imâm nâm kimseden sâdır olan da‘vâ-yı sahîha-i şer‘iyede gıbbe’l-istişhâd şöyle şehâdet ettiler ki, müteveffâ-yı mezbûr maraz-ı mevte yakalanıp başını mevt yastığına koyduğunda sülüs-i malının techîz ve tekfînine, eyyâm-ı mu‘tâdede it‘âm-ı fukarâya ve kalanın vücûh-ı hayrâta sarf edilmesini vasiyet edip müsteşhed-i mezbûru da vesâyasının tenfîzine vasîyy-i muhtâr nasb etti ve vasiyetinde mukırrân ve musırran vefât eyledi. Mezkûr Mehmed Efendi de vesâyet-i merkūmeyi kabûl edip hizmet-i lâzımesini edâya müte‘ahhid oldu. Biz bu husûsa şâhidleriz şehâdet dahi ederiz dediklerinde ba‘de ri‘âyeti şerâiti’l-kabûl şehâdetleri hayyiz-i kabûlde vâkı‘a olup mûcebiyle hükmolundu. Cerâ zâlike ve hurrire fi’l-yevmi’l-ışrîn min-şehri Cumâdelûlâ li-sene seb‘a ve ışrîn ve elf. Şühûdü’l-hâl: Mustafa b. Mehmed el-müezzin, Hüseyin b. Emre el-müezzin, Mustafa b. Süleyman, Mehmed b. Ahmed, el-Hâc Ali b. Mustafa ve gayruhum