İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 66 Hüküm no: 16 Orijinal metin no: [3b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Himmet’in alacağının beytülmal için tahsil edildiği Mahmiye-i İstanbul’da vâki‘ Yavuzer mahallesi sâkinlerinden olup vefât eden el-Hâc Himmet b. Pir Gaib’in zâhirde zevcesi Şâkire Hatun’dan gayrı vâris-i ma‘rûfu olmamağın müteveffâ-yı mezbûrun muhallefâtının selâse-i erba‘ı beytü’l-mâle âid olup mahmiye-i mezbûrede beytü’l-mâl-i hâs emîni olup selâse-i erba‘ına vâzı‘ü’l-yed olan Mahmud Ağa b. Pervâne meclis-i şer‘-i şerîfde sâhibü’l-kitâb Mehmed b. Mahmud mahzarında ikrâr ve ta‘bîr-i ani’l-merâm edip müteveffâ-yı mezbûr el-Hâc Himmet mesfûr Mehmed’e bi-tarîki’l-mudârebe otuz bir bin fıddî Osmânî akçe verip meblağ-ı mezbûr merkūm Mehmed zimmetinde iken mersûm el-Hâc Himmet vefât eylemeğin emânet-i mahkiyem hasebi ile bi’t-tamam ve’l-kemâl zikr olunan otuz bir bin akçeyi mezkûr Mehmed yedinden alıp beytü’l-mâl için kabz eyledim dedikde gıbbe’t-tasdîk vicâhen mâ-hüve’l-vâki‘ bi’t-taleb ketb olunup tâlibi yedine def‘ olundu. Tahrîren fi’l-yevmi’t-tâsi‘ ışrîn şehri Cumâdelûlâ li-sene seb‘a ve ışrîn ve elf. Şühûdü’l-hâl: el-Hâc Ömer b. Mustafa, el-Hâc Hızır b. Durmuş, İbrahim Bâşe b. Yusuf, el-Hâc Mehmed b. Ali, el-Hâc İlhan b. Mehmed, Mehmed b. Ahmed, Perviz b. Abdullah, Mehmed b. İbrahim, Ali b. Mustafa, Bâli b. Mustafa, Ali b. ( ) ve gayruhum.