İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 66 Hüküm no: 17 Orijinal metin no: [4a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mühenna bt. Hızır’ın terekesinden mîrî hissenin Mahmud Ağa tarafından alındığı Dârü’s-saltanati’s-seniyye mahmiye-i Kostantıniyye’de beytü’l-mâl-i hâs emîni olan fahrü’l-akrân Mahmud Ağa b. Pervâne meclis-i şer‘-i şerîf-i lâzımü’t-teşrîfde mahmiye-i mezbûrede Kadırgalimanı mahallesinde fevt olan Mühenna bt. Hızır nâm hatunun zevc-i metrûkü ve vârisi olan fahrü’l-akrân Mehmed Bey b. Abdülmennan nâm cündî mahzarında bi’t-tav‘i’s-sâf ikrâr ve i‘tirâf edip müteveffât-ı merkūmenin zevcinden gayrı zâhirde neseben vâris-i ma‘rûfu olmadığı ecilden terekesinin nısfı beytü’l-mâle âid olmağın müteveffât-ı merkūmenin muhallefâtından makbûzum olup bey‘ olunan terekesi bahâsından hâsıl nısf-ı mâl olan beş bin dört yüz akçeyi mîrî için mezbûr Mehmed Bey yedinden emânet-i mahkiyem hasebiyle bi’t-tamam ve’l-kemâl alıp kabz etdim. Yedinde bir akçe ve bir habbe bâkī kalmadı dedikde mukırr-ı merkūmu ikrâr-ı meşrûhunda el-mukarru lehü’l-mezbûr Mehmed Bey vicâhen ve şifâhen tasdîk ve tahkīk edip mâ-hüve’l-vâki‘ bi’t-taleb ketb ve terkīm olunup yed-i tâlibe vaz‘ ü def‘ olundu. Tahrîren fî-evâhiri şehri Cumâdelûlâ li-sene seb‘a ve ışrîn ve elf. Şühûdü’l-hâl: Ali Efendi b. Abdünnebi Efendi, Feridun Efendi b. Abdullah el-imâm, Nesîmî Efendi b. ( ) el-imâm, Mustafa Efendi el-imâm, İskender Çelebi b. Abdullah, Mustafa el-muhzır