İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 68 Hüküm no: 21 Orijinal metin no: [4b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şark seferinde vefat eden Ali Ağa’nın muhallefatından zevcesinin hissesini aldığı Mahmiye-i İstanbul mahallâtından Kiçi Hatun mahallesi sâkinlerinden olup bundan akdem yeniçeri kethudâsı <> iken Şark seferinde vefât eden Ali Ağa b. Abdullah’ın zevce-i metrûkesi Saliha bt. Abdullah nâm hatun tarafından müteveffâ-yı mezbûrun muhallefâtından hisse-i rub‘ ve mehr-i müecceli kabza ve kendiye îsâle vekîl olup hasm-ı şer‘î câhid mahzarında vekâleti şehâdet-i Müslimîn ile şer‘an sâbite olan fahrü’l-akrân Abdi Ağa b. Hürrem nâm müteferrika meclis-i şer‘-i hatîr-i lâzımü’t-tevkīrde mahmiye-i mezbūrede tâife-i râciline bi’l-fi‘il beytü’l-mâl emîni olup müteveffâ-yı mezbûrun muhallefâtına vâzı‘ü’l-yed olduğuna mukır olan mefharü’l-ümenâ Mehmed Ağa b. İlyas muvâcehesinde ikrâr ve takrîr-i kelâm edip müteveffâ-yı mezbûrun emîn-i müşârün-ileyh yedinde makbûz olan muhallefâtdan müvekkilem mezbûre Saliha’ya âid olan elli beş bin yedi yüz doksan üç akçeye hisse-i rub‘unu ve yedi bin akçe müecceli kassâm-ı askerî defteri mûcebince emîn-i merkūm yedinden müvekkilem mezbûre Saliha için bi’t-tamam ve’l-kemâl alıp kabz eyledim dedikde mukırr-ı merkūmu ikrâr-ı meşrûhunda el-mukarru lehü’l-mezbûr bi’l-muvâcehe tasdîk ve tahkīk eylemeğin mâ-hüve’l-vâki‘ bi’t-taleb ketb ve terkīm olundu. Tahrîren fî-evâsıtı şehri Cumâdelûlâ li-sene seb‘a ve ışrîn ve elf. Şühûdü’l-hâl: İbrahim b. Abdullah, Baba İslâm b. Hasan, Mustafa b. Mustafa, Mehmed b. Hamza ve gayruhum mine’l-hâzırân.