İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 69 Hüküm no: 22 Orijinal metin no: [4b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kıymet bt. Arslan’ın hibe ettiği eşyalarının vârisine verilmesi için beytülmal eminine tenbihde bulunulması Mahmiye-i Kostantıniyye mahallâtından Mirâhor mahallesinde sâkin iken bundan akdem fevt olan Kıymet bt. Arslan nâm zimmîyyenin li-eb ve üm karındaşı oğlu ve vârisi olan Arslan v. Karakoti nâm zimmî mezbûre Kıymet mukaddemâ zevci olup hâlâ vefât eden Ali Bey’in zâhirde vâris-i ma‘rûfu olmayıp muhallefâtı beytü’l-mâle âid olmağla mahmiye-i mezbûrede hâlâ beytü’l-mâl-i hâs emîni olup müteveffâ-yı mezbûr Ali Bey’in muhallefâtına vâzı‘ü’l-yed olan Mahmud Ağa b. Pervâne’yi meclis-i şer‘-i şerîfe ihzâr ve mahzarında takrîr-i da‘vâ edip müteveffâ-yı mezbûr Ali Bey’in hâl-i hayatında ve kemâl-i sıhhatinde zevcesi ve mezbûre Kıymet mahalle-i mezbûre-i mezkûrede menzili dâhilinde silk-i mülkünde olan üç döşeği, dört yorganı, dört tencere ve iki kazgan ve iki leğen ve altı tepsisi ve iki güğümü ve iki bakracı ve iki tâbeyi (tava) ve altı yasdığı ve yedi minderi ve üç köhne kaliçe ve üç Selanik keçesi mezbûre Kıymet’e bin yirmi üç Zilka‘desi’nin üçüncü gününde hibe-i sahîh-i şer‘iye ile hibe etmiş idi deyü târih-i mezkûr ile müverrah mahmiye-i mezbûrede Davudpaşa nâibi Mevlana Abdullah Efendi [b.] Hüdaverdi imzâsıyla mümzâ ve hatmi ile mahtûm takrîr-i meşrûhu mutâbık hüccet-i şer‘iye ibrâz edip zikr olunan eşyâyı emîn-i mezbûrdan taleb ederim suâl olunsun dedikde gıbbe’s-suâl emîn-i mezbûr mazmûn-ı hücceti inkâr ile cevâb vericek müdde‘î-i merkūm Arslan’dan sıdk-ı makāline mutâbık beyyine taleb olundukda hüccet-i merkūm zeylinde isimleri mastûr olan el-Hâc Ali b. Mustafa ve Mustafa b. Mehmed nâm kimesne[ler] li-ecli’ş-şehâde meclis-i şer‘e hâzırân olup fi’l-vâki‘ müteveffâ-yı mezbûr Ali Bey hâl-i hayatında zevcesi mezbûre Kıymet’e târih-i mezkûrda bizim huzûrumuzda mezbûr[e] Kıymet’in menzili dâhilinde olan üç döşeği, dört yorganı, dört tencereyi ve iki kazganı ve iki leğeni ve altı tepsisi ve iki güğümü ve iki bakracı ve iki tâbeyi ve iki minderi ve üç köhne kaliçe ve üç Selanik keçesi hibe-i sahîh-i şer‘iye ile hibe ve temlik edip ol dahi meclis-i hibede zikr olunan eşyâyı kabûl ü kabz eyledi biz bu husûsa şâhidleriz şehâdet dahi ederiz <> deyü her vechile mazmûn-ı hüccete mutâbık edâ-i şehâdet-i şer‘iye eylediklerinde ba‘de’t-tezkiye ve’t-ta‘dîl şehâdetleri hayyiz-i kabûlde vâki‘ oldukda zikr olunan eşyânın müdde‘î-i mezbûr Arslan’a teslîmine emîn-i merkūma tenbîh olunup <>. Tahrîren fi’l-yevmi’l-ışrîn min-Cumâdelûlâ li-sene seb‘a ve ışrîn ve elf. Şühûdü’l-hâl: Hüseyin b. Emre, Mehmed b. Ahmed el-Yesârî, Mustafa b. Süleyman, Mustafa el-muhzır, İslâm el-muhzır ve gayruhum mine’l-hâzırân.