İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 75 Hüküm no: 32 Orijinal metin no: [5b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe ve kardeşlerin amcasının muhallefatından hisselerini aldıkları Zahr-ı kitâbda ismi mastûr olup yine derûn-i kitâbda mastûrü’l-esâmî olan Mustafa ve Ali ve Ahmed nâm sagīrlerin li-ebeveyn karındaşı ve kıbel-i şer‘-i münîfden mansûb vasîleri olan Mehmed Beşe b. Kurt Çavuş meclis-i şer‘-i hatîr-i lâzımü’t-tevkīrde bundan akdem yeniçeriler kethudâsı iken Şark seferinde vefât eden ammisi Ali Ağa b. Abdullah’ın zâhirde zevce-i metrûkesi Saliha Hatun bt. Abdullah’dan gayrı vâris-i ma‘rûfu olmadığı ecilden muhallefâtının selâse-i erba‘ına vâzı‘ü’l-yed olan mefharü’l-ümenâ yeniçeriler beytü’l-mâli emîni <> Mehmed Subaşı b. İlyas muvâcehesinde ikrâr ve i‘tirâf edip müteveffâ-yı mezbûrun muhallefâtı ba‘de’l-ihrâcât ber-mûceb-i defter-i kassâm-ı askerî yüz altmış yedi bin üç yüz yetmiş dokuz akçe olup zikr olunan akçeden irs-i şer‘le bana intikāl eden yirmi yedi bin sekiz yüz doksan altı akçeyi asâleten ve vasîleri olduğum mezbûrûn Mustafa ve Ali ve Ahmed nâm sagīr karındaşlarıma intikāl eden seksen üç bin altı yüz seksen sekiz akçeyi sıgār-ı mezbûrûn için vesâye[ten] cem‘an yüz on bir bin beş yüz seksen dört akçeyi emîn-i müşârün-ileyh yedinden bi’t-tamam ve’l-kemâl ahz ü kabz eyledim dedikde mukırr-ı mezbûru ikrâr-ı meşrûhunda emîn-i mezkûr bi’l-muvâcehe tasdîk etmeğin mâ-hüve’l-vâki‘ bi’t-taleb ketb olundu. Tahrîren fî-evâsıtı Cemâziyelâhire li-sene seb‘a ve ışrîn ve elf. Şühûdü’l-hâl: Ali Ağa b. Abdülmennan eş-şehîr bi-Zağarcıbaşı, Mehmed Çavuş b. Abdülmennan an-çavuşân-ı yeniçeriyân, İslâm Bey kâtib-i bostancıyân-ı hâssa, Galatalı Muslu Çelebi, Eyüb Beşe an-sarrâcân-ı hazret-i ağa, Hasan Çelebi kâtib-i cây-ı kethudâ, İlyas Beşe b. Abdulkadir çukadâr, Baba İslâm b. Hüsnü.