İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 75 Hüküm no: 33 Orijinal metin no: [6a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Beytülmal Emini Mahmud Ağa’nın müteveffa Yahya Efendi b. Mustafa’nın Musa b. Ahmed’deki alacağını tahsil ettiği Oldur ki, Mahmiye-i İstanbul’da vâki‘ beytü’l-mâl-i hâs emîni Mahmud Ağa b. Pervâne meclis-i şer‘-i şerîfde Giresunlu olup mahmiye-i mezbûrede sâkin olan sâhibü’l-kitâb Musa b. Ahmed mahzarında ikrâr ve ta‘bîr-i ani’l-merâm edip kasaba-i mezbûreden Yahya Efendi b. Mustafa nâm kādı vefât edip mezbûr Musa zimmetinde vakıyyesi beynlerinde ilm-i şer‘î ile ma‘lûm fındık bahâsından on üç bin on iki akçe hakkı olup müteveffâ-yı mezbûrun zâhirde vâris-i ma‘rûfu olmayıp meblağ-ı mezbûr beytü’l-mâle râci‘ olmağın emânetim hasebi ile zikr olunan on üç bin on iki akçeyi beytü’l-mâl için mezbûr Musa yedinden alıp kabz eyledim dedikde gıbbe’t-tasdîk vicâhen mâ-hüve’l-vâki‘ alâ-vukū‘ihî bi’t-taleb ketb olunup tâlibi yedine def‘ olundu ki vakt-i hâcetde müzekkiri’l-hâl ola. Tahrîren fi’l-yevmi’s-sâmin aşer min-Cemâziyelâhire li-sene seb‘a ve ışrîn ve elf. Şühûdü’l-hâl: Osman Efendi [b.] Süleyman el-kādı, es-Seyyid Hacı Yusuf [b.] Nurullah, el-Hâc Mehmed [b.] Aydın, Muslihiddin [b.] Taştimur el-kādı, Baba İslâm [b.] Hasan ve gayruhum.