İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 85 Hüküm no: 45 Orijinal metin no: [7b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hümâ Hatun’un muhallefatına beytülmal emininin karışmaması Mahmiye-i Kostantıniyye’de vâki‘ Kadırga limanında sâkin olan fahrü’l-e‘âzım zü’l-kadri’r-refî‘ ve’l-câhi’l-menî‘ hazret-i İbrahim Paşa b. el-merhûm Mehmed Paşa meclis-i şer‘-i hatîr-i lâzımü’t-tevkīrde mahmiye-i mezbûrede beytü’l-mâlü’l-hâs emîni olup emânet-i mahkiyesi hasebiyle mahmiye-i mezbûre mahallâtından Bostancıbaşı mahallesinde vefât eden Hümâ Hatun bt. Abdullah’ın zâhirde zevce-i metrûkesi [zevc-i metrûkü] Mehmed Bey b. Abdullah el-Yesârî’den gayrı vâris-i ma‘rûfu olmamak zu‘muyla muhallefâtının selâse-i erba‘ına vâzı‘ü’l-yed olan Mahmud Ağa b. Pervâne muvâcehesinde takrîr-i da‘vâ edip merhûme-i mezbûre Hümâ Hatun bundan akdem vefât eden li-eb karındaşım Kurt Paşa’nın mu‘takası olup el-hâletü hâzihî merhûm Kurt Paşa’nın veresesinden benden gayrı kimesne kalmayıp mezbûre Hümâ Hatun’un verâseti min-ciheti’l-velâ bana münhasıradır velâ zımnından vârisi olduğum mezbûr Hümâ hâl-i hayatında huzûr-ı Müslimînde ikrâr edip hazret vefât eylemişdir emîn-i mezbûr muhallefâtına bi-gayrı vech-i şer‘î vaz‘-ı yed eylemişdir kasr-ı yed eylemesin matlûbumdur dedikde emîn-i mûmâ-ileyh müşârün-ileyh İbrahim Paşa hazretlerinin verâsetini inkâr etmeğin müdde‘î-i merkūmdan da‘vâsına muvâfık beyyine taleb olundukda udûl-i Müslimînden mezbûr Hümâ’yı ma‘rifet-i şer‘iye ârifîn olan Mehmed Efendi b. Ramazan el-imâm ve el-Hâc Hamza b. Abdullah nâm kimesneler meclis-i şer‘e li-ecli’ş-şehâde hâzırân olup istişhâd olunduklarında fi’l-hakīka müteveffât-ı mezbûre Hümâ Hatun hâl-i hayatında ve kemâl-i sıhhatinde bizim huzûrumuzda müdde‘î-i mezbûr İbrahim Paşa hazretler[i] mu‘takım olan Kurt Paşa merhûmun li-eb karındaşıdır ve benim min-ciheti’l-usûbet ve’l-velâ vârisimdir deyü bizim huzûrumuzda ikrâr eyleyip hazret fevt oldu bu husûsa şâhidleriz şehâdet dahi ederiz deyü edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri hayyiz-i kabûlde vâki‘ oldukdan sonra mûcebiyle hüküm-birle mâ-hüve’l-vâki‘ bi’t-taleb ketb olundu. Tahrîren fî-evâhiri Cemâziyelâhire li-sene seb‘a ve ışrîn ve elf. Şühûdü’l-hâl: İlyas Beşe b. Abdulkadir çukadâr, İslâm Çelebi b. Hüseyin, Baba Mehmed b. Hamza, Mustafa b. Mustafa el-muhzır.