İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 99 Hüküm no: 56 Orijinal metin no: [13b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mustafa Çelebi’nin evinin çocukları arasında taksim edildiği Mahmiye-i Kostantıniyye’de Muhtesib Karagöz mahallesinde vefât eden merhûm Mustafa Çelebi b. İbrahim nâm kimesnenin sulbiye-i sagīresi Kerime’nin vasîsi olup diğer sulbiyesi Hatice Hatun tarafından şer‘an vekâleti sâbite olan Ahmed Çelebi b. Haydar ve merhûm-ı mezbûrun diğer sulbiyesi Âişe tarafından şer‘an vekâleti sâbite olan zevci Derviş Çavuş b. Mehmed ve diğer sulbiyesi Nesli Hatun tarafından sâbitü’l-vekâle olan Piyale Bey b. Abdullah nâm kimesneler meclis-i şer‘-i şerîfe hâzırûn olup şöyle takrîr-i kelâm eylediler ki merhûm-ı mezbûrun Mimâr İlyas mahallesinde vâki‘ olup taşrada bir odayı ve bir ahırı ve muhavvata ve içeride iki tahtânî evleri ve bir sofa-i kebîri ve bir sofa-i sagīr ve mahzen ve bi’r-i mâi ve bir bahçeyi ve bahçenin cânib-i kurbiyesinde bir köşkü ve altında bir sofayı ve bi’r-i mâi müştemil olup cânib-i kurbiyesi merhûm-ı mezbûr vakfı ve cânib-i cenûbîsi tarîk-i âm ve cânib-i şarkīsi ba‘zan Mehmed Çelebi ve ba‘zan Memi Çavuş mülki ile ve cânib-i garbîsi Faik Bey mülki ile mahdûd olan mülk menzili merhûm vefât eyledikde verâseti zikr olunan benât-ı erba‘iyesiyle zevci [zevcesi] Âişe[‘ye] münhasıra olup Âişe mezkûre tehârüc-i şer‘î tarîki ile beynlerinden ihrâc olunup menzil-i mezkûr zikr olunan benât beynlerinden kalmağın hâlâ müvekkilâtımız mezkûrân Hadice ve Âişe ve Nesli menzil-i mezkûr mâ-beynlerinden kısmet-i âdile ile taksîm olunmasını taleb eyleriz dediklerine binâen hâssa mi‘mârlarından fahrü’l-akrân Kabil Çavuş b. Abdülmennan nâm kimesne ile ve ehl-i vukūfdan cem‘-i gafir ile menzil-i mezkûrun üzerine varılıp menzil-i mezkûrun cümle binâsı kısmet-i sahîha ile takvîm olunup ve cümle arâzisi mesâha olunup cümlesi iki hisse olunup her bir hissede iki kız şerîk olmak münâsib görülmeğin menzil-i mezkûrun cânib-i cenûbîsinde olan cümle evleri, binâlar ile bahçede incir ağacına ve şeftâli ağacına ve bir cânibi dahi kenîfe varınca bir hisse olup ve cânib-i kıblesinde vâki‘ olan köşk ile önünde bahçe zikr olunan hisse müntehî olunca bir hisse olup kur‘a olundukda cânib-i cenûb[un]da vâki‘ olan Hadice ile Rahime’nin nasîblerine düşüp ve cânib-i kıblesinde vâki‘ olan hisse dahi Âişe ile Nesli’nin nasîblerine düşdükde vâki‘u’l-hâl bi’t-taleb alâ-vukū‘ihî ketb olunup yed-i tâlibe vaz‘ olundu ki lede’l-hâce kâşif-i mâ-cerâ ola. Tahrîren fî-evâili Receb sene elf. Şühûdü’l-hâl: Mustafa b. Ramazan, İbrahim Çavuş b. İsmail, Osman Bey b. Abdullah, Nasuh Subaşı b. Abdullah, Oruc b. Mahmud, Mustafa Çavuş b. [İ]dris, Ali b. Abdullah.