İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 98 Hüküm no: 55 Orijinal metin no: [13a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi’nin muhallefatından dolayı zevcesi Ayşe’ye açtığı davadan men olunduğu <> Mahrûse-i Kostantıniyye’de Muhtesib Karagöz mahallesinde vefât eden merhûm Mustafa Çelebi b. İbrahim nâm kimesnenin zevcesi Âişe bt. el-Hâc Mustafa nâm hatun meclis-i şer‘-i şerîfde merhûm-ı mezbûrun sulbiyesi Hadice Hatun mahzarında takrîr-i da‘vâ edip merhûm-ı mezbûrun muhallefâtından mezbûre Hadice zimmetinde bir mikdâr nakd ve bir mikdâr esbâb vardır onları taksîme idhâl etmemişdir onlardan dahi suâl olunup hisse-i şer‘iyem ifrâz olunmak taleb ederim dedikde gıbbe’s-suâl Hadice bende ancak yirmi beş sikke-i hasenesi vardır ondan gayrı nesne yokdur deyü cevâb vermeğin müdde‘iye-i mezkûreden mezbûre Hatice zimmetinde ikrârından ziyâde taleb eylediği nukūd ve esbâbından nesne var idiğine beyyine taleb olunup beyyineden âcize ve kāsıra olup merkūme Hatice’nin tahlîf olunmasın taleb eyleyip mezbûre Hadice vech-i meşrûh üzere istihlâf olundukda mezbûre Hadice kendide merhûm-ı mezbûrun nukūd ve esbâbından zimmetinde olan yirmi beş sikke-i haseneden gayrı yok idiğine ve merhûmun muhallefâtından sâir vereseden bir nesne saklamadığına yemîn billâh etmeğin mezbûre Âişe da‘vâsından men‘ olunup vâki‘u’l-hâl bi’t-taleb ketb olunup yed-i tâlibine vaz‘ olundu ki lede’l-hâcet müzekkir-i mâ-cerâ ola. Tahrîren fî-evâili Recebi’l-mürecceb li-sene elf. Şühûdü’l-hâl: İbrahim Çavuş b. İsmail, Osman Bey b. Abdullah, Nasuh Bey b. Abdullah, Oruc b. Mahmud, Mustafa Çavuş b. İdris, Ali b. Abdullah.