İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 103 Hüküm no: 61 Orijinal metin no: [15a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Bey’in evinin arsasının eşi Ayşe Hatun’a ait olduğu Mahrûse-i Kostantıniyye mahallâtından Derviş Ali mahallesi sâkinlerinden vefât eden İsmail Bey b. Abdullah Çelebi kızı Âişe Hatun kıbelinden husûs-ı âti’z-zikre vekîl olup vekâleti hasm-ı şer‘î mahzarında Mehmed b. Hayreddin el-imâm ve Mustafa b. Memi el-müezzin ve Mehmed b. Zünnûn ve Hasan b. Behram nâm kimesneler şehâdetleriyle sâbite olan Davud Bey b. Abdullah el-Eyser müteveffâ-yı merkūmun zevcesi ve hîn-i vefâtına değin taht-ı nikâhında olmağla vârisesi olan Âişe Hatun bt. Lütfullah mahzarında takrîr-i kelâm ve tebyîn-i merâm edip müteveffâ-yı mezbûrun hîn-i vefâtına değin sâkin olduğu evlerin yerleri merkūme Âişe bt. Lütfullah’ındır binâlarına harc olunan akçe merhûm İsmail Bey’indir müvekkilem mezbûre Âişe Hatun’un evlerde ol-vechden hakkı vardır hisse-i şer‘iyesin taleb ederin deyicek merkūme [Âişe] bt. Lütfullah’dan suâl olundukda kaziyye-i mezbûreyi mukırra ve mu‘terife olup merhûm İsmail Bey’in binâlara yirmi bin akçesi harc olunmuşdur mâ‘adâsı benim akçemden harc olunmuşdur dedikde bi’t-taleb tahrîr olundu. Cerâ zalike ve hurrire fî-evâsıtı Muharremi’l-harâm min-şühûri sene elf. Şühûdü’l-hâl: Hamza b. Abdullah, Ali b. Abdullah, Behram b. Abdullah, Behram b. İskender, Ali b. Hüseyin ve gayruhum.