İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 104 Hüküm no: 62 Orijinal metin no: [15a-2, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Murad Ağa b. Abdülmennan’ın vasiyetle kölesini azat ettiği Bundan akdem mahmiye-i Kostantıniyye mahallâtından Sarıgöz mahallesinde vefât eden merhûm-ı mebrûr el-vâsıl ilâ-rahmeti rabbihi’l-hannân Murad Ağa b. Abdülmennan’ın zevcesi fahrü’l-muhadderât Hümâ Hatun bt. Abdullah ve kızı Fatıma nâm hatunlar kıbellerinden âti’z-zikr tedbîr ikrârına vekâleti bimâ hüve nehcü’s-sübût şer‘an sâbit olan fahrü’l-hutebâ Şaban Efendi b. Abdüsselam meclis-i şer‘-i şerîf-i şâmihü’l-imâda hâzır olup müteveffâyı mezbûr Murad Ağa’nın hâl-i hayatı ve kemâl-i akl ü sıhhatinde Rusiyyü’l-asl, orta boylu, sarışın, elâ gözlü, çatık kaşlı, sol omzunda eser-i cerh bulunan hâmil-i hâze’l-kitâb Müstedam b. Abdülvahhab nâm abd-i memlûkünü mevtimden kırk gün mukaddem hürsün diyerek tedbîr-i mukayyed ile âzâd ettiğini ikrâr eyledi. Mezbûr Murad Ağa vefât edip rabbine kavuştuğunda mezheb-i muhtâra tevfîkan abd-i merkūm efendisinin cemî‘ mâl-ı mevrûsundan âzâd ve sâir ahrâr-ı asliyîn-i mükellefîn gibi hür oldu. Cerâ zâlike ve hurrire fî-evâili şehri Saferi’l-hayr min-şühûri sene elf. Şühûdü’l-hâl: Fahrü’l-kuzât İbrahim Efendi, Mehmed b. Ali, Ahmed Çelebi el-kâtib, Cafer b. Abdullah, Mustafa Bey b. Abdullah