İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 108 Hüküm no: 70 Orijinal metin no: [16a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Genceli İsmail Bey ile Deli Hızır Paşa’nın vereseleri arasındaki davada sulh oldukları Sâbıkā Kutayis? beyi olan umdetü’l-ümerâi’l-kirâm Genceli İsmail Bey b. Hızır meclis-i şer‘-i şerîfde mahrûse-i İstanbul’da müteveffâ olan merhûm Deli Hızır Paşa b. Hamza’nın sagīr oğlu Mehmed Bey’in kıbel-i şer‘den mansûb vasîsi olan Hasan Bey b. Abdullah mahzarında takrîr-i kelâm edip müteveffâ-yı merkūm Gence beylerbeyisi iken ben Gence’de çerâk ağalığını bana alıvermek için müteveffâ-yı merkūm Hızır Paşa’ya yirmi dört bin akçe ile yedi batman kahve verip elân musâlahatım husûle karîb olmamağın verdiğim meblağ-ı merkūm yirmi dört bin akçe ile yedi batman kahveyi hâlâ muhallefâtından taleb ve da‘vâ edip vasîyy-i mesfûr Hasan Bey mahzarında meclis-i şer‘de umdetü’l-ümerâi’l-kirâm Pervâne Bey b. Abdülalâm ve Maksud Bey b. Emir Ali şehâdetleriyle isbât dahi etmiş idim el-hâletü hâzihî muslihûn tavassut edip sagīr-i merkūma sulh enfa‘ olmağın altı bin akçeye ıslâh etdiler ben dahi sulh-ı merkūmu kabûl edip zikr olunan altı bin akçeyi vasîyy-i mezkûr yedinden bi’t-tamam ve’l-kemâl alıp kabz eyleyip meblağ-ı merkūmdan yirmi dört bin akçeye varıncaya değin on sekiz bin akçeden ve yedi batman kahveden ibrâ-i âm ile ibrâ-i zimmet etdim ba‘de’l-yevm bu husûsa müte‘allik benden bi’l-asâle ve’l-vesâye da‘vâ sudûr ederse lede’l-hükkâm mesmû‘a olmaya deyü ikrâr-ı tav‘î etdikde mâ-hüve’l-vâki‘ gıbbe’t-tasdîk ketb olundu. Tahrîren fî-evâhiri’l-Muharrem sene 1006 Şühûdü’l-hâl: Es-sâbikūn