İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 108 Hüküm no: 71 Orijinal metin no: [16a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi ile Deli Hızır Paşa’nın vereseleri aralarındaki davada sulh oldukları Mahmiye-i Konya’da Hisârönü nâm mahallede vefât eden Mustafa Çelebi b. Sefer Çavuş’un li-ebeveyn karındaşı ve alâ-vechi’l-inhisâr vârisi olduğu hasm-ı şer‘î mahzarında Mehmed Bey b. Nasuh el-cündî ve Mustafa Bey b. Abdullah el-cündî şehâdetleri ile sâbit olan Mehmed Çavuş b. Sefer Çavuş meclis-i şer‘de mahrûse-i İstanbul’da vefât eden merhûm Deli Hızır Paşa b. Hamza’nın sagīr oğlu Mehmed Bey’in tesviye-i umûru için kıbel-i şer‘den mansûb vasîsi olan Hasan Bey b. Abdullah ve nâzırı olan umdetü’l-ümerâi’l-kirâm zübdetü’l-küberâi’l-fihâm Pervâne Bey b. Abdülalâm mahzarında ta‘bîr-i merâm edip müteveffâ-yı merkūm Hızır Paşa Karaman beylerbeyisi iken mahmiye-i mezbûrede Şeyhevi nâm mahallede karındaşım mezbûr Mustafa Çelebi’nin lede’l-cîrân ma‘lûmü’l-hudûd bahçesinde memâlikinden biri maktûl bulunmağın bi-gayrı vech-i şer‘î karındaşım mezbûrdan yirmi bin akçesin alıp karındaşım mesfûr Mustafa Çelebi meblağ-ı mehûz-ı merkūmu da‘vâ ve taleb etmek üzere iken vefât edip ben geri verâsetim hasebiyle meblağ-ı merkūmu mezbûr Hızır Paşa’dan hâl-i sıhhatinde da‘vâ ve taleb etdiğimde edâ edeyin birkaç gün imhâl eyle deynimdir deyü ikrâr etdikde vasîyy-i mesfûr ve nâzır-ı mezkûr mahzarında isbât etmiş idim. El-hâletü hâzihî Müslimûn tavassut edip sulh sagīr-i merkūma enfa‘ olmağla elli sekiz sikke tammü’l-vezn ve sahîhü’l-ayâr floriye ıslâh etdiler ben dahi sulh-ı merkūmu kabûl edip zikr olunan elli sekiz sikke tammü’l-vezn ve’l-kâmilü’l-ayâr floriyi bi’t-tamam ve’l-kemâl vasîyy-i mesfûr yedinden alıp kabz eyledim ve yirmi bin akçeye değin bâkī kalan meblağdan ibrâ-i âm ile ibrâ-i zimmet eyledim ba‘de’l-yevm bu husûsa müte‘allik benden bi’l-asâle ve’l-vekâle da‘vâ sudûr ederse lede’l-hükkâmi’l-kirâm mesmû‘a olmaya deyü ikrâr-ı tav‘î etdikde mâ-hüve’l-vâki‘ gıbbe’t-tasdîk ve’t-taleb tahrîr olundu. Tahrîren fî-evâhiri’l-Muharrem li-sene sitte ve elf. Şühûdü’l-hâl: Es-sâbikūn