İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 123 Hüküm no: 84 Orijinal metin no: [19b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Bey ve Ahmed Bey’in annelerinin muhallefatından dolayı olan davada sulh oldukları Mahmiye-i İstanbul’da Abdullah Ağa mahallesinde vefât eden Şâhdîdâr bt. Abdullah nâm Hatun’un verâseti kebîr oğulları Ahmed Bey’e ve Mustafa Bey’e münhasıra olup mezbûr Mustafa Bey b. Hasan meclis-i şer‘-i şerîfde karındaşı merkūm Ahmed Bey b. Hasan mahzarında takrîr-i kelâm edip vâlidemiz mezkûre Şâhdîdâr vefât etdikde mezbûr Ahmed Bey vâlidem-i mezbûrenin mahmiye-i mezbûrda Yedikule kurbünde vâki‘ lede’l-ahâli ve’l-cîrân ma‘lûmü’l-hudûd olan menziline ve Mihriban bt. Abdullah nâm câriyesine ve kırk miskāl altın bilezik ve bir burma bileziğine ve bir kafes inci ve beş aded altın yüzük ve bir cevherî altın zehgîrine ve beş pâre bezine ve altı velense ve altı aded döşek ve on iki aded yasdık ve beş aded tenceresine ve sâir muhallefâtına vâzı‘ü’l-yed olup eşyâ-i mezbûreden bi-hasebi’ş-şer‘-i şerîf bana âid olan hisse-i şer‘iyemi da‘vâ ve taleb etdiğimde mezbûr Ahmed Bey eşyâ-i merkūmeden ba‘zısın ikrâr ba‘zısın inkâr etmekle beynimizde münâza‘ât-ı kesîre ve muhâsamât-ı şedîde vâki‘ olmuşdu el-hâletü hâzihî muslihûn tavassut edip terk-i da‘vâ ve fasl-ı husûmet için bana sekiz bin nakd râyicü’l-vakt akçe alıverip sulh etdiklerinde ben dahi meblağ-ı merkūm sekiz bin akçeyi meclisi-i sulhda bi’t-tamam ve’l-kemâl alıp kabz eyledim min-ba‘d muhallefât-ı müteveffât-ı mezbûreye müte‘allik da‘vâdan mezbûr Ahmed Bey’in zimmetin ibrâ-i âm ve ıskāt-ı tam ile ibrâ ve ıskāt eyledim ba‘de’l-yevm mezbûre vâlidemin muhallefâtına müte‘allik benden asâleten veyâ vekîlimden vekâleten da‘vâ sudûr eder ise lede’l-hükkâmi’l-kirâm mesmû‘a ve makbûle olmaya deyü ikrâr-ı tav‘î ve i‘tirâf-ı mer‘î etdikde mukırr-ı mezbûru ikrâr-ı meşrûhunda mukarrun-lehü’l-mezbûr vicâhen tasdîk ve şifâhen tahkīk edicek mâ-vaka‘a bi’t-taleb ketb olundu. Tahrîren fî-evâsıtı şehri Şevvâl li-sene hamse ve elf. Şühûdü’l-hâl: Kıdvetü’l-a‘yân Mehmed Bey b. Abdülmennan, Sinan Subaşı b. Abdullah, Mehmed b. Yusuf el-imâm, Ferruh Bey b. Abdullah, Seydi b. Yusuf el-müezzin, el-Hâc Hasan b. Abdullah, Mehmed b. Ramazan, Mustafa b. Mahmud, Mehmed b. Hamza, Ferhad b. Abdullah, Bedir b. Veli ve gayruhum.