İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 124 Hüküm no: 85 Orijinal metin no: [19b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Neyyare Hatun’un müteveffa eşi Gördöslü Hasan Çavuş’un muhallefatından hissesini aldığı Mahrûse-i İstanbul’da Sultan Bâyezid Han -aleyhi’r-rahmetü ve’r-rıdvân- Câmi‘-i şerîfi kurbünde Mühreciler ardında vâki‘ mahallede sâkin olup Rumeli’nde Priştine yolunda bundan esbak vefât eden Gördöslü merhûm Hasan Çavuş b. Abdullah’ın sagīre kızı Safiye’ye ve Rabia’ya kıbel-i şer‘den mansûb vasî ve kebîre kızı Fatıma’nın husûs-ı âtîye ale’n-nehci’ş-şer‘î vekâleti sâbite olup vekîli olan fahrü’l-akrân Kasım Bey b. Abdullah nâm cündî ve müteveffâ-yı merkūmenin usûbet-i nesebiyye ile vârisleri olan düstûrü’l-ekrem vezir-i efham Hazret-i Hasan Paşa ve umdetü’l-ümerâi’l-kirâm İbrahim Bey b. Mehmed Paşa taraflarından vekîl olup bimâ hüve tarîkü’s-sübût şer‘an vekâleti sâbite olan umdetü’l-a‘yân Hasan Ağa b. Abdullah meclis-i şer‘-i şerîfde müteveffâ-yı merkūmun zevcesi ve vârisesi olup mahalle-i merkūmede sâkine olan fahrü’l-muhadderât Neyyâre Hatun bt. Abdullah mahzarında takrîr-i merâm edip müteveffâ-yı merkūm Hasan Çavuş’un mahrûse-i mezbûrede ve gayrıda vâki‘ olan akār ve emti‘a ve urûz ve nukūdu cem‘an yirmi bir yük ve yedi yüz yetmiş akçe olup meblağ-ı merkūmdan harc-ı ma‘kūl için beş bin akçe ihrâc olundukdan sonra bâkī kalan yirmi yük ve doksan beş bin yedi yüz [yetmiş] akçeden zevce-i mezbûre Neyyâre Hatun’un sümün hisse-i şer‘iyesi iki yüz altmış bir bin akçe olmuş idi el-hâletü hâzihî cümle-i muhallefâtdan mahalle-i merkūmede vâki‘ olup kıymeti doksan bin akçede karâr edip muhavvata-i dâhiliyesi iki beyt-i ulvî ve iki beyt-i süflî ve bir kenîfi ve muhavvata-i hâriciyesi bir ahır ve selamlığı ve bir müşterek su kuyusunu müştemil olup bir tarafı Sultan Bâyezid Hân-ı merhûm vakfına ve bir tarafı Kādı Aziz Vakfı’na ve bir tarafı tarîk-i âmma ve bir tarafı Rahime Hatun mülküne hudûdu müntehî olan mülk menzil zikr olunan kıymetden ziyâde ile yüz seksen bin akçeye zevce-i merkūme kabûl edip ve sagīre-i mersûmeler âhar vilâyetde olup vech-i mezkûr üzere ziyâde bahâ ile zevceye verildiği sagīrlere enfa‘ olmağın zevce-i merkūmenin sümün hissesinden yüz seksen bin akçeye menzil-i mezkûru mezbûr Neyyâre Hatun’a def‘ ü teslîm edip ol dahi vech-i meşrûh üzere kabz ve tesellüm eyledi. Min-ba‘d mülk-i mahzıdır deyip ve müteveffâ-yı merkūmun medyûnu olan Murad Ağa’da olan otuz bin akçe ve diğer medyûnu olan hâlâ mezbûre Neyyâre Hatun’un zevci olan Hüseyin b. Abdullah’da altı bin akçe sümün hisse-i şer‘iyesine ta‘yîn olunup bu takdirce sümün hissesinden muhallefât-ı müteveffâda ancak kırk beş bin dokuz yüz yetmiş bir akçesi kalıp onu dahi edâ edelim dediklerinde mâ-hüve’l-vâki‘ kayd olundu. [Tarih yazılmamıştır.] Şühûdü’l-hâl: Müezzin Muslihiddin Efendi b. Hamza ve diğer Mehmed Efendi b. Hamza ve Keyvan b. Abdullah ve Receb Bey b. Abdullah ve İbrahim Çavuş b. Mustafa ve gayruhum.